Dán vahkkoloahpa lea vuosttaš geardde go Norges Jeger- og Fiskerforbund lágida oktasaš «nieiddaid vahkkoloahpa» miehtá riikka, ja sii háliidit vel eambbo nieiddaid searvat NJFF:i.
– Mii lágidit «nieiddaid vahkkoloahpa» miehtá riikka dán vahkkoloahpa. Mis lea mihttu oažžut vel eambbo nieiddaid iežamet searvái, čilge Silje Klæbo, geas lea ovddasvástádus áŋgiruššat eambbo nissonolbmuid NJFF:i.
Vahkkoloahpas galget olu iešguđetlágan aktivitehtat, ja galget doaimmat juohkehažžii. Leat doaimmat nu go čuonjábivdu, báhčineahket, hárjehallat beatnagiin, oahpahallat kárttain ja kompássain ja olu eará.
Ávvirii duođašta Silje Klæbo ahte leat doalut Finnmárkkus maiddái. Daid doaluid lágidit earret eará Njávdáma JFF, Čáhcesullo JFF ja Gáŋgaviikka JFF.
Leavnnja JFF ges dieđiha Facebook bokte ahte sis lea «nissonolbmo eahket» ges maŋŋebárgga, gos lea vejolaš báhčit leairaduvváid.
Nu boahtá ovdan preassadieđáhusas.
