Politiijat leat almmuhan nama nieiddas guhte duššai lihkohisvuođas sotnabeaivvi čuovganeapmái.
Finnmárkku politiijat ožžo sotnabeaivvi čuovganeapmái, njukčamánu 18. beaivvi dii. 02:10, dieđu skohterlihkohisvuođa birra Leaibevuonas Porsáŋggu gielddas.
Guokte nieidda galgaba vázzán skohterluoddaráigge go bođii skohter ja vujii njeaiga. Nubbi nieida roasmmehuvai bahuid ja jámii maŋŋel heaggagádjuma.
Politiijat válde skohtervuoddji ja dolvo su leansmánnekantuvrii, gos galggai čilget mii lea dáhpáhuvvan.
Dutkagoahtán ášši
Politiijat leat dutkagoahtan lihkohisvuođa. Lihkohisvuođabáikkis leat váldon iskosat, muhto lea vuos beare árrat addit eambbo dieđuid dan birra ja mii lea dáhpáhuvvan, čállet politiijat preassadieđáhusas.
Almmuhan nieidda nama
Politiijat leat dál almmuhan nieidda nama. Lei 19-jahkásaš Karine Emilie Negård gii duššai skohterlihkohisvuođas.
Oapmahaččat leat dieđihuvvon ja suovvan almmuhit nama.
