Niegada šaddat ballerinan

– Biret Inga Pieskis leat dánsunattáldagat maid dánsunpedagoga ii oainne beare dávjá. Son lea čeahppi ja bargá ollu šaddat vel čeahpibun. Son lea leamaš mielde Kárášjoga kulturskuvllas jagi 2009 rájes, ja lea iešguđet dánsunkurssain leamaš mielde, nu go ođđaáigásaš dánsun, baleahtta, akrobatihkka ja yoga/stretch. Baleahtta lea su váimmu lagamusas. Son illudahttá gehččiid iežas energiijain go dánsu. Biret-Inga Pieski lea ollu čájálmasain leamaš mielde, ja searvan ollu workshopaide ja kulturskuvlla festiválas diibmá, muitala Biret-Inga Pieski dánsunpedagoga Ansjelika Kemi Niehkostipeandda neahttasiiddus, ja son sávvá Pieski bures ovdánit dánsamáilmmis.

Álggii árrat

Son álggii dánset go lei 6 jagi boaris, ja dánsii álggos ođđaáigásaš dánssaid. Nuppi jagi álggii dánset baleahta, ja dál dánse sihke baleahta, showdánsa ja stretch maid lea oahppan Kárášjoga kulturskuvllas.

– Mun liikon dánset ja dovddan iežan friddjan go dánssun. Liikon oahppat ođđa koreografiijaid ja leat lávddis. Mu niehku lea šaddat ballerina-dánsejeaddjin, ja mu ovdagovva lea Svetlana Zakharova go son lea nu čeahppi, muitala Pieski.

Háliida eanet dánsenoahpu

– Jus mun vuoittán niehkostipeandda, de háliidan eanet dánsunoahpu váldit vai oahpan ođđa vugiid. Livččii maid somá geahččat Našunálabaleahta Oslos ja vel ordnet ođđa dánsunbiktasiid, muitala nuorra dánsejeaddji, Biret-Inga Pieski.

Finnmárkku nuorat geain lea vejolašvuohta oažžut niehkostipeandda:

Aleksander Døvle – Musihkka – Čáhcesuolu

Biret -Inga Pieski – Dánsa – Kárásjohka

Linnea Eriksen – Dánsa – Áltá

Olesya Butrseva – Musihkka – Deatnu

Runa Elde Skårset – Teáhter – Davvinjárga

Skjalg-Helmer Vian – Visuála dáidda – Čáhcesuolu

Tiril Malèn Murberg – Musihkka – Áltá