Beaivváš Sámi Našunálateáhter buvttada «Snøfrid» teáhterbihtá, sámegonagasa nieidda birra gii gonagas Harald Hårfagrii ráhkásmuvai.
Beaivváš Sámi Našunálateáhter buvttada «Snøfrid» teáhterbihtá, sámegonagasa nieidda birra gii gonagas Harald Hårfagrii ráhkásmuvai.
Beaivváš Sámi Našunálateáhter lea dál ráhkkanišgoahtán ođđa teáhterbihttái. Das galgá álgočájáhus ođđajagis Guovdageainnus, dieđiha Beaivváš Sámi Našunálateáhter preassadieđáhusas.
Dát lea dán teáhterjagi maŋemuš buvttadus, ja lea guđat álgočájálmas dán áigodagas. Čieža neavttára leat mielde, Ingá Márjá Sarre ja Ánte Siri neaktiba váldorollaid.
Teáhtera ovddeš hoavda, Haukur J. Gunnarsson, lea bihtá bagadalli ja su bagadallanveahkki lea Elle Sofe Henriksen, gii maiddái lea bihtá koreográfa.
Dramatihkkár Arne Berggren lea čállán dán historjjá dramáhtalaš muitalussan fápmoriidaleami, juonalašvuođa ja ráhkisvuođa nana magihkalaš fámu birra.
Sámegonagasa nieida
Snøfrida birra beassá oaidnit čájálmasas man Arne Berggren lea čállán. Čájálmas lea Snorre gonagasmuitalusa vuođul, mas Snorre muitala Haralda gaskavuođa sámi niidii Snøfridii.
Snøfrid lei sámegonagasa Svåse nieida. Norgga gonagas Harald, guhte šattai dovddusin «Hårfagre» namain, ráhkásmuvai čáppa Snøfridii ja hilggui iežas gonagaslaš geatnegasvuođaid ja náitalii suinna ja ásaiduvvui sápmelaččaid lusa.
Muitalus gávdno Heimskringla girjjis, ja muhtun kapihttalis Harald Hårfagre sagamuitalusas.
