Dán čavčča johtá Riksteatern «Dagsbrott» bihtáin, mii lea ovttasbargu Giron Sámi Teáhteriin. Sarakka Gaup neaktá máŋga rolla dás.
Dán čavčča johtá Riksteatern «Dagsbrott» bihtáin, mii lea ovttasbargu Giron Sámi Teáhteriin. Sarakka Gaup neaktá máŋga rolla dás.
Dramatihkkár Anders Duus ja rešissevra Sara Giese máhccaba Riksteatern ođđa bihtáin Dagbrott, mii lea humoristtalaš bihttá.
Ovdal leaba soai fárrolaga dahkan earret eará rámiduvvon «Allt ska bort» bihtá Riksteatern ja Teater Västernorrlandain, čállá Riksteatern preassadieđáhusastis.
Oahpai olu
Dagbrott lea muitalus mas riidovuloš ruvkefáddá seaguhuvvo beaivválaš hástalusaiguin dego áibbašemiin, fuolastemiin ja ráhkesvuođain. Bihtá vuolggasadji lea váttes ruvkefáddá ja dat čájeha bargguhisvuođa, sisabahkkemiid ja sámi vuoigatvuođaid vuostálasvuođaid.
Dát lea fáddá mii addá máŋga beali ruoŧa politihkkii ja mii olusiidda lea dego rabas hávvin:
– Ruvkkiin ja prospekteremiin leat dakkár váikkuhusat maid unnán olbmot dihtet, sihke birrasii ja olbmuide. Dasa lassin bidjet ruvkkit giliide ja bargodilleáššiide fokusa. Munnje lei bargu dáinna bihtáin dakkár mátki mas olu ohppen, erenoamážit go šattai sáhka sámi vuoigatvuođaáššiin, lohká dramatihkkár Anders Duus.
Dehálaš fáddá ožžon unnán fuomášumi
Ruvkefáddá lea duogážin bihtás go máŋga eallinvuorbbi čájehuvvojit humoristtalaččat, árgabeaivvi hástalusat nu mo ráhkesvuohta, niegut ja stuorra plánat seaguhuvvojit oktii.
Lávddis leat Sarakka Gaup Giron Sámi Teáhteris, David Lenneman ja Mårten Andersson.
– Ruvkefáddá lea máŋgga dáfus dehálaš, muhto lea guhká ožžon unnán fuomášumi mediain. Dagbrott lihkostuvvá muitalit birasváikkuhusaid, sámi vuoigatvuođaid, barggu ja kapitála birra, seammás go maid muitala olmmošlaš gaskavuođaid birra mat guoskkahit olbmuide, lohká rešissevra Sara Giese.
Bihttá čájehuvvo vuosttaš geardde čakčamánu 30. beaivvi Lommas.
