-Almmuhus-
-Almmuhus-
-Almmuhus-
OĐĐASAT– Neahttagivssideapmi lea heajos bargoohcan

– Neahttagivssideapmi lea heajos bargoohcan

-

-

Dan dadjet bargoaddit Sámis. Visot neahttageavaheapmi mii olbmos lea, guođđá luottaid, ja daid sáhttet boahttevaš bargoaddit fas gávdnat.

Ságat váldodoaimmaheaddji Geir Wulff lohká ahte dakkár guhte givssida neahtas muitala iežas birra hui olu. 

– Sii čájehit ahte eai máhte albma ládje láhttet, ja dat lea dakkár gean bargoaddit eai hálit virgádit. Mun gal logašin ahte dakkár guhte neahtas lea fasttiid čállán, ii livčče gal vuosttaš válga mus jus galggašin virgádit olbmo, vaikko man buorre formálalaš gelbbolašvuohta sus livččii, lohká aviisadoaimmaheaddji.

 

Boahttevaš bargoaddit sáhttet gávdnat dieđuid

Dán vahkku lea internašunála kampánja jođus «antigivssidanvahkku» mas olles vahkku galget fuomášuhttit ja eastadit neahttagivssideami.

Olu áššit sáhttet guoskat givssideapmái, muhto neahttagivssideapmi lea olgguštit, bilkidit, áitit, vuortnuhit ja loavkidit earáid neahtas.

Medietilsynet dieđihii preassadieđáhusastis ahte heajos láhtten neahtas lea heajumus bargoohcan mii olbmos sáhttá leat.

– Buot maid leat čállán ja bargan rabas neahttakanálain sáhttet gávdnot, ii ge dárbbaš eará go ohcat Google:is. Boahttevaš bargoaddit sáhttet gávdnat buot daid dieđuid, ii ge okta ge virgát givssideaddji, čálii Medietilsynet.

(Ášši joatká gova vuolábealde)


Ságat váldodoaimmaheaddji Geir Wulff.
Govven: Nils Johan Vars

Givssideapmi boahtá ruovttoluotta

Wulff lohká ahte daid háviid go ii leat eahpádus ge lea go givssideapmi, de fertejit olbmot ipmirdit ahte dat boahtá fas ruovttoluotta. 

– Vaikko dalle soitet meinen fallehit nuppi, de boahtá dat fas alcces ruovttoluotta maŋit áigái. Neahtas galgá maid áššálaččat nagodit ákkastallat, nu go buot eará arenain ge. 

– Lea maid nu ahte das mii lea čállon, das lea eambbo fápmu go dan maid dadjá. Ovdamearkka dihte sáhttá suhtuid siste ribahit dadjalit, muhto go don čálát, de lea das eambbo deaddu, lohká Wulff.

 

Loga maid: – Govat ledje govve­juvvon feasttain, go leat bihkka gárremiin, ja go leat seaŋggas muhtun nieiddain

 

Ávžžuhit jurddašit neahttageavaheami birra

Karriere Finnmark lea karriearaguovddáš gos bargoohccit ožžot ráđiid oahppoháhkama ja bargoeallima birra.

Alf Roger Storhaug lea karrieararáđđeaddi Karriere Finnmark:s.

Son lohká ahte sii eai sáhte nu olu dadjat juste dákkár áššiid birra, ja čujuha bargiidorganisašuvnnaide.

– Obbalaččat lávet mii ávžžuhit bargoohcciid jurddašit makkár digitála luottaid sii guđđet, lohká Storhaug.

 

 – Dábálaš ‹‹Googlet›› 

NRK Sámi direktevra Mona Solbakk lohká ahte lea dábálaš ohcat Google:is dieđuid bargoohcciid birra, ja ahte bargoaddi geahččá makkár luottaid guođđá neahtas.

Jus de gávdná ahte bargoohcci dahje bargi lea ovdamearkka dihte čállán fasttiid earáid birra, de dat ii iešalddis mearkkaš ahte bargoohcci ii oaččo barggu su luhtte.

– Sáhttá nu ahte bohtet gažaldagat dan birra bargojearahallamis, ja sáhttá ahte goit ge šaddá ságastan fáddá. Mii eatnasat leat olbmot geat meaddit, ja jus maŋŋil lea ieš reflekteren ja vaikko átnon ándagassii ášši ovddas.

(Ášši joatká gova vuolábealde)


NRK Sámi direktevra Mona Solbakk.
Govven: Maret Elin Kemi

Solbakk lohká ahte buot maid olmmoš bargá neahtas, lea miellagiddevaš earáide, leaš dal bargoohcci, bargi dahje hoavda.

– Jus lea bargoohcci gean árvvoštalan virgádit, livččii hui lunddolaš ságastallat dan birra bargojearahallamis. Jearašin movt ieš lea jurddašan dan ášši birra, ja mii dasa lea duogáš, lohká NRK Sámi direktevra.

 

Maiddái rávisolbmot vásihit neahttagivssideami:  – Fertejin váldit bottu

 

Obanassiige givssideapmi ii leat buorre

Guovdageainnu ráđđeolmmái Kent Valio vástidii hui johtilit obbalaččat givssideami birra.

– Givssideapmi obbalohkii ii leat buorre bargoohcan, dat čuohcá bargobirrasii, ja vuođđu virgádit olbmo lea ahte son nagoda ovttasbargat earáiguin, lohká Valio.

(Ášši joatká gova vuolábealde)


Guovdageainnu ráđđeolmmái Kent Valio.
Govven: Sárá Máret Rávdná Oskal

Dehálaš hilgut

Kárášjoga Scandic hotealla direktevra John Arne Mathisen lohká Ávvirii ahte lea dehálaš hilgut givssideami.

Son lohká ahte lea hui hárve ahte soames áigu virgádit dakkár olbmo gii čájeha negatiiva láhttenvuogi, lea maid dehálaš ahte olmmoš sáhttá bealuštit iežas daguid, leaš dál neahtas vai ii.

– Iežan bealis sáhtán lohkat ahte ii livčče gal beare buorre jus soames gii mus ohcá barggu, lea givssidan neahtas. Mun in virgádivčče dakkára. Ii leat nu ahte olbmos ii leat diehtu maid ieš čállá nehttii, jáhkán oallugiid vajálduhttit maid sii čállet nehttii. Dat ii leat buorre, lohká Mathisen.

-Almmuhus-