Boazodoallošiehtadallamiid oktavuođas lea Stáhta bidjan erenoamáš gáibádusa Norgga Boazosápmelaččaid Riikkasearvái, jus dan eai ollašuhte 2018:i rádjai de sáhttet massit organisašuvdnadoarjaga. Mannan vahkkoloahpa riikkačoahkkin lei sáhttit ollašuhttit dán gáibádusa, muhto dan eai nagodan.
Boazodoallošiehtadallamiid oktavuođas lea Stáhta bidjan erenoamáš gáibádusa Norgga Boazosápmelaččaid Riikkasearvái, jus dan eai ollašuhte 2018:i rádjai de sáhttet massit organisašuvdnadoarjaga. Mannan vahkkoloahpa riikkačoahkkin lei sáhttit ollašuhttit dán gáibádusa, muhto dan eai nagodan.
Dán jagáš boazodoallošiehtadusas gáibidii stáhta ahte jus NBR riikkastivrii eai olit dásseárvvu sohkabeali dáfus, nu gohčoduvvon 60/40 njuolggadusa, de massá NBR dan 6,3 miljovdnasaš organisašuvdnadoarjaga man ožžot boazodoallošiehtadusa bokte.
60/40 njuolggadus lea ahte unnimusat 40 proseantta nissonolbmot dahje dievdoolbmot galget leat stivrras.
Nissonat eanetlogus várrelahttun
Go NBR riikačoahkkin ledje jienastan ja geargan, de ledje sii jienastan guhtta dievddu ja golbma nissonolbmo riikkastivrii, ja de eai olihan ge dásseárvvu sohkabeali dáfus.
Riikkastivrii válljejuvvojit ovcci áirasa. Čieža geat ovddastit iežaset báikkálaš searvvi, jođiheaddji, ja nuoraidlávdegotti jođiheaddji.
Nu leat ge dievddut ain eanetlogus NBR riikkastivrras go sii eai doahttalan stáhta gáibádusa.
Jođiheaddjis ovttajienalaččat
NBR jođiheaddji sadjái ii lean eambbo okta evttohus, ja dat lei jođiheaddji, Ellinor Marita Jåma. Son válljejuvvui de ovttajienalaččat.
Riikkastivrra bealis muitalii jođiheaddji, Ellinor Marita Jåma, ahte stáhta leat dadjan ahte jus NBR riikkastivrii eai leat olihan dásseárvvu 2018:i rádjái de manahit organisašuvdnadoarjaga. Son čilgii ná:
– Mii oliheimmet dásseárvolága mielde doarvái nissonolbmuid. Go lágas čuožžu ahte stivrras mas leat gaskal 6 ja 8 áirasa, doppe galget unnimusat leat golbma nissonolbmo, ja dan mii oliheimmet, lohká aiddo válljejuvvon NBR-jođiheaddji, Ellinor Marita Jåma.
Muhto Jåma vajálduhtii ahte nuoraidlávdegotti jođiheaddji lea ovccát stivralahttu, ja son lea dievdoolmmoš.
Loga maid: Sihkastedje dološáiggi eret njuolggadusain
Eai evttohan 60/40
Go galge jienastišgoahtit, de bođii ovdan ahte válgalávdegoddi ii lean nagodan evttohit eambbo 37,5 proseantta nissonolbmuid riikkastivrii, namalassii golbma nissonolbmo ja vihtta dievddu, oktii jođiheddjiin Ellinor Marita Jåmain.
Go nuoraidlávdegotti jođiheddjiin vel ledje evttohan Jovsset Ánte Sara, de eai lean go 33,3 proseantta nissonat riikkastivrii evttohuvvon.
Go sátnevuoru ožžo áirasat, de evttohii vel Nils M. Gaup lonuhit Guovdageainnu áirrasevttohusa, Berit Marie E. Eira eret ja Aslak Mathis Turi sisa riikastivrii.
Nu de livčče šaddan čieža dievddu ja guokte nissonolbmo.
Eambbo nissonolbmot
Nissonolbmot riikačoahkkimis reagerejedje dasa, ja guovttis sis evttoheigga guokte nissonolbmo ovdalii go guokte dievdolobmo riikkastivrii.
Marit Kirsten Anti Gaup evttohii vuos válgalávdegotti riikkastivraevttohasaid Kárášjoga johttisámiid searvvis, Per John Anti, ja várrelahttoevttohasa Mette Anti Gaup lonuheaba saji.
Inger Anita Smuk fas evttohii Unni Fjellheim ovddabeallai Inge Even Danielsen riikkastivrii, muhto Fjellheim háliidii geassádit.
– Mu mielas livččii dehálaš leamaš oažžut eambbo nissonolbmuid stivrii, nu go stáhta leat gáibidan. Muhto go mu evttohas háliidii ieš geassádit, de mun doahttalin dan ja gessen dan evttohusa, muitalii Smuk Ávvirii.
Dievddut eanetlogus
Go jienasteami čađahedje, de vuoittáhalle visot evttohasat maid evttohedje riikačoahkkimis, earret nuoraidlávdegotti jođiheaddji, ja válgalávdegotti evttohasat jienastuvvojedje riikkastivrii.
Boađusin šattai golbma nissonolbmo vihtta dievddu, mii ii deavdde 60/40-njuolggadusa.
Dasa lassin sohpe vel ođđa njuolggadusa dán jagáš riikačoahkkimis, mas daddjo ahte galgá riikačoahkkin mii vállje nuoraidlávdegotti, ja dohko lei evttohuvvon Jovsset Ánte Sara.
Nuoraidlávdegottis fas ieža evttohedje Per Thomas Oskala jođiheaddjin.
Jienasteami bokte čájehuvvui ahte Per Thomas Oskal, Romssa boazosámiid fylkkasearvvis, válljejuvvui nuoraidlávdegoddái. Nu šattai vel okta dievdu riikkastivrii.
Oktiibuot golbma nissonolbmo ja guhtta dievddu, nissonolbmot dušše 33,3 proseantta riikkastivrras.
