-Almmuhus-
-Almmuhus-
OĐĐASAT NBR dárbbaša lassi bargiid

NBR dárbbaša lassi bargiid

-

-

Norgga Boazosápmelaččaid Riikkasearvvis leat dušše guokte hálddahusbargi, danin gártá sihke jođiheaddji ja stivra veahkkin čađahit bargguid. Das leat váikkuhusat politihkkemii. NBR stivra ja báikkálaš servviid jođiheaddjit leamaš workshopas ja muitalit vuogádaga fertet rievdadit.

Norgga Boazosápmelaččaid Riikkasearvvi (NBR) nubbinjođiheaddji Per John Anti miehtá ahte organisašuvdna ii leat doaibman doarvái bures go čállingoddi lea beare unni.

 – Mis leat dušše guokte bargi dál, ja danin gártá stivra ja ovdaolmmoš veahkkin bargat. Váikkuhus lea ahte ovdaolmmoš ii beasa politihkket. Mii dárbbašit 3-4 ođđa bargi, lohká Anti.

 

Eai geargga buot vel rievdadit

Dán vahkkus lea NBR stivra ja báikkálaš servviid jođiheaddjit deaivvadan Stjørdalenis Davvi-Trøndelagas. Sii leat čađahan joavkobargguid ja árvalan man láhkai berrejit rievdadit searvvi vuogádaga.

 – Mii eat leat maidege mearridan workshopas, in ge mun jáhke geargat buot rievdadit vel dán jagi. Dál galget buot báikkálaš searvvit geahčadit joavkobarggu bohtosiid ja riikkačoahkkimis besset miellahtut muitalit iežaset oaiviliid, čilge Anti.

 

Ruđaid fertejit háhkat

NBR nubbinjođiheaddji mielas lei suohtas workshop bokte geahčadit makkár vejolašvuođat sis leat, ja muitala buriid árvalusaid boahtán ovdan. Son čilge ahte joavkkut leat geahčadan man láhkai NBR sáhtašii lasihit dietnasa.

 – Ruhtadilli lea NBR:a stuorámus hástalus, rehketdoalus oaidnit ahte áito hal de birget. Maŋimuš 5-6 jagi leat konsultašuvnnat stádain lassánan, ja danin lassánit johtin- ja orrungolut. Mis leat vejolašvuođat háhkat eanet ruđaid, lohká Anti.

 

Vejolaš divrudit miellahtodivvaga

Workshopii lei Norgga boanddaidsearvi bovdejuvvon muitalit man láhkai sin organisašuvdna doaibmá. Sii dinejit bures miellahtomávssuin ja fállet iešguđetlágan miellahttovuođaid.

 – Go mii šiehtadallat stádain, de ákkastallet ahte eai leat galle organisašuvnna mat ellet stáda alde. Danin eat oaččo lassi doarjagiid. Min sisaboađus boahtá 5-6 proseantta miellahtuin. Jus dán loktešeimmet dahje válddašeimmet mávssu boazologu vuođul, de oččošeimmet kánske eanet doarjaga, čilge nubbinjođiheaddji Per John Anti.

 

NBR dárbbašivččii 3-4 miljovnna

Go NBR galgá cealkámušaid buktit stádii, de gártá juohke báikkálaš searvi ieš dulkot lossa áššebáhpáriid. Lassi bargit čállingottis livččii danin geahpedit maiddái sin barggu. Muhto jus NBR galgá lasihit bargoveaga de dárbbašit oktiibuot 9-10 miljovnna jahkái.

 – Dál váilu aŋkke 3-4 miljovnna dása. Mii leat maid geahčadan vejolašvuođaid ásahit prošeaktavirggiid maidda sáhtašii ohcat ruhtadoarjagiid, dadjá Anti.

- Advertisement -
-Almmuhus-