Biebmobearráigeahčču duođašta ahte leat gávdnan guokte positiiva iskosa maŋŋel go leat 150 gotti báhčán Nordfjella guovllus.
– Mii eat leat hirpmahuvvan go leat gávdnan guokte gotti main leat positiiva iskosat, ja dat duođašta dehálašvuođa jávkadit olles goddeealuid dain guovlluin vai jávkadit dávdda. Mii navdit gávdnat eambbo iskosiid main lea positiiva boađus dađistaga, ja giitit daid bivdiid ja earáid geat garrasit barget dáid beivviid, muitala Biebmobearráigeahču seniorráđđeaddi Kristin Ruud Alvseike.
Jođánit dieđihit
Biebmobearráigeahčču váldá oktavuođa bivdiiguin geat leat báhčán dán guokte ealli, ja vižžet vel njuovvanbázahusaid ja ráppiid váris maid isket dárkileappot Veterinearainstituhtas. Biebmobearráigeahčču gieđahallá daid ráppiid das viidáset.
– Lea hui dehálaš ahte bivdit dieđihit elliid maid sii báhčet bivddus. Dađi jođáneappot midjiide bohtet dieđut bahččon ealli birra, dađi jođáneappot beassat iskat ja dieđihit sállaša dearvvašin, čilge Alvseike Biebmobearráigeahču neahttasiiddus.
