Márjá Eira bođii nubbin suohkanprofiila- gilvvus 2018.
Kommunal rapport áigečálus lágida suohkanprofiila-gilvvu juohke jagi. NAV jođiheaddji Guovdageainnus Márjá Eira lei okta sis geat ledje árvaluvvon vuoitin., ja son oaččui earenoamáš olu jienaid.
Vuosttaš saji válddii dovddus politihkkár ja Oslo gávpotráđđi Lan Marie Nguyen Berg, Miljøpartiet De grønne -bellodagas.
Sámegiela ovddideaddji
Álbmot dat jienastii vuoiti sms bokte. Eira lei nammaduvvon dasa go lea áŋgirit ovddidan giela ja kulturipmárdusa iežas doaimmas NAV-jođiheaddjin. Son lea ožžon dohkkehuvvot guovddáš NAV:s digitálabálvalusaid sámegillii, ja son bargá garrasit maid oččodit ođđa NAV guovllu, namalassii NAV Sápmi. Nammadeamis čilgejit ahte dehálaš oassi su barggus lea álo leamaš oažžut sámegiela, kulturipmárdusa ja sámi eallinvuogi NAV vuogádahkii.
– Son lea dan rájes go lea álgán NAV:i bargui, áŋgiruššan addit geavaheddjiide buriid bálvalusaid sámegillii. Buot arenain gos lea, son muittuha man dehálaš sámegiella lea NAV:s, čállá Kommunal Rapport.
– Dehálaš bargu
Romssa ja Finnmárkku NAV jođiheaddji Grete Kristoffersen lohká sámegiela leat dehálažžan ipmárdusa ja maiddái riektesihkarvuođa dáfus, ja lohká Márjá Eirra leat áŋgiris ovddideaddjin dien bealis.
