Nisu vujii biillain šiltta njeaiga narkotihkkagárrenvuođas ja vikkai maŋŋel dájuhit politiijat ahte su biila lei suoláduvvon.
Nisu vujii biillain šiltta njeaiga narkotihkkagárrenvuođas ja vikkai maŋŋel dájuhit politiijat ahte su biila lei suoláduvvon.
Oarje-Finnmárkku politiijaguovlu dieđihedje twitteris ikte disdaga diibmu 18.00, ahte okta biila lei vuodján veallut ovtta šiltta ovtta johtolatrieggás Álttá guovddážis. Biila lei okta alit Toyota, ja iige bisánan dáhpáhusa maŋŋel. Šilta lei bonjagan ja ledje ollu lásemoalut geainnu alde.
Politiijat gávdne biilla maŋŋelažžas, muhto ii vuoddji. Politiijat oidne guokte nuora guođđime biilla, ja ohce báikkis.
Diibmobeale maŋŋel, diibmu 18.36, dieđihedje politiijat ahte ledje ožžon oktavuođa vuddjiin, mii lei okta 30 jahkásaš nisu.
– Nisu riŋgii politiijade, ja vikkai oažžut min jáhkkit ahte biila lei suoláduvvon, muhto ii min lean nu álki dájuhit, lohká politiijaguovllu operašuvdnajođiheaddji Jan-Olav Schjølberg ifinnmark áviisii.
Politiijat válde nissona mielde politiijastašuvdnii gažadeapmái.
Politiijaid iskosat čájehedje ahte nisu lei narkotihkkagárrenvuođas vuodján ja politiijat ceggeje ášši nissona vuostá dan geažil.
