Aitto bálkkáhuvvon lávdehábmejeaddji ja Disney-suksessa šuokŋadahkki leaba guovddážis Beaivváš čájálmasas mas fargga lea vuosttáščájálmas.
Aitto bálkkáhuvvon lávdehábmejeaddji ja Disney-suksessa šuokŋadahkki leaba guovddážis Beaivváš čájálmasas mas fargga lea vuosttáščájálmas.
Mannan geasi vuittii Bård Lie Thorbjørnsen Hedda-bálkkašumi buoremus lávdehábmema ovddas čájálmasas «Når vi døde våkner», Trøndelag Teateris. Ja dál čakčat lea son Beaivvážis, lávdehábmejeaddjin “Skoavdnji” čájálmasas.
Buvttadussii lea maid vižžon eará gii maid lea dahkan hui nanu barggu iežas suorggis, nammalassii Disney-suksessa šuokŋadahkki Frode Fjellheim.
– Fjellheim dagai lávlaga/luođi mii šattai animašuvdnafilmma Frost/Frozen (/Bihci) álgošuokŋa, filbma mainna Disney lea mearehis ládje lihkostuvvon, čállá Beaivváš Sámi Našunála Teáhter preassadieđáhusastis.
Fjellheim lea maid bálkášuvvon ovdalaš, earret eará lea sutnje geigejuvvon Norgga deháleamos musihkkabálkkašupmi, Spellemannsprisen. Hedda-bálkkašupmi lea fas Norgga deháleamos teáhterbálkkašupmi.
Maŋimuš bihttá hovdenáiggis
Bård Lie Thorbjørnsen gal lea oktii ovdal leamaš iežas čehppodagain Beaivvážis, čájálmasas “Guohcanuori šuvva”, 2011, muhto Fjellheim gal ii leat, son lea vuohččan Beaivvážis.
Øystein Heitmann lea máŋgii leamaš Beaivvážis, earret eará čájálmasas “Nikio” 2008, “Allaq” 2010 ja “Min duoddarat III” 2011. Haukur J. Gunnarsson lea fas bagadan máŋga čájálmasa, earret eará bagadii son mánáčájálmasa “Njuorju Niilá”, mii čájehuvvui ja mátkkoštii dá dálvegiđa ovdalaš dán jagi.
– Gunnarsson lea nu mot diehtit heaitime teáhterhoavdan Beaivvážis, dát čájálmas šaddá su maŋemuš čájálmas Beaivvážis obanassiige teáhterhoavdan, čállá Beaivváš.
Skoavdnji čájálmasas deaivvdit olbmuid buriid ja bahá beliiguin. Soaiggus, mii lei čájálmasa gáldu, lea vuolgán Nuorta-Finnmárkku rittus ja sámi dramatihkar Inger Margrethe Olsen lea čállán dan teáhterii.
Dáhpáhusat leat mearrasámi birrasis. Čájálmasain čálli lea háliidan bidjat fuomášumi veahkaválddálašvuhtii mii dáhpáhuvvá ruovttuin; mo lea vejolaš ahte veahkaválddálašvuohta ja ráhkisvuohta guktot orruba ja ealliba seamma robi vuolde, ja maiddái mo lea vejolaš ahte dát ii boađe oidnosii birrasis.
Dasa lassin jearrá maid čálli duostat go mii čorget ja njulget ovddeš daguid ja dáhpáhusaid, duostat go mii deaivvadit iežamet balddonasaiguin.
Čájálmas čájehuvvui vuosttaš geardde Beaivvážis 1994:, dál čájehuvvo ođđasit ođđa hámis.
Čájálmasa neavttárat leat Egil Keskitalo, Ida Løken Valkeapää, Heli Huovinen, Nils Henrik Buljo, Ingá Márjá Sarre ja Áilloš.
Vuosttáščájálmas lea Guovdageainnus golggotmánu 9. B. , maŋŋel dán johttá čájálmas viidát.
