Finnmárkku fylkkagieldda rehketdoallu čájeha ahte lea 3,9 proseantta netto doaibmaboađus. Nu nanu boađus ii leat leamaš 2013 rájes.
Finnmárkku fylkkagieldda rehketdoallu čájeha ahte lea 3,9 proseantta netto doaibmaboađus. Nu nanu boađus ii leat leamaš 2013 rájes.
– Lean hui duđavaš go fylkkagieldda boađus lea sakka buorránan, cealká fylkkaráđđeolmmái Øystein Ruud. Ášši meannuduvvui duorastaga fylkkadikkis Álttás.
Ferte buorre stivrejupmi
Seammás lea fylkkagielda golahan 27,5 miljovnna ruvnno eambbo bálvalusbuvttadeapmái go bušehttii lei biddjon. Dat lea birrasii guokte proseantta eambbogeavaheapmi.
– Vaikke ii leat go guokte proseantta, de lea mu mihttu ovddasguvlui doalahit buori ekonomiijastivrema. Mihttun ferte doaimmahit daid rámmaid siskkobealde mat bušeahtas leat biddjon, lohká Ruud.
Measta miljárdabealli
Finnmárkku fylkkagielda investerii 460 miljovnna ovddas diibmá. Oktiibuot lea fylkkagielda investeren miljárdda ovddas dan maŋemuš golmma jagis.
Fylkkaráđđeolmmái čilge ahte dát leat dehálaš investeremat Finnmárkku infrastruktuvrii, mat bohtet buorrin fylkka álbmogii.
Son namuha erenoamážit ođđa vistti ja divodeami Álttá joatkkaskuvllas, prošeakta mii máksá birrasii 440 miljovnna.
