Kárášjoga Bargiidbellodat sávvá nannet gieldda bargiid vuoigatvuođaid ja oažžut eambo bistevašvirggiid, vaikko Ráđđehus lea mielas lasihit gaskaboddosašvirggiid.
Kárášjoga Bargiidbellodat sávvá nannet gieldda bargiid vuoigatvuođaid ja oažžut eambo bistevašvirggiid, vaikko Ráđđehus lea mielas lasihit gaskaboddosašvirggiid.
Vaikko Ráđđehus lea álkidan vejolašvuođa lasihit gaskaboddosaš virggiid, de ii hálit Kárášjoga Bargiidbellodat dan čuovvulit, muhto baicce oažžut gildii eambo bistevaš virggiid.
– Mii dáhtošeimmet maiddái, ahte nu guhká go gielddas leamaš gaskaboddosaš virgádeamit, de galggašedje sii geat leat guhkit áigge bargan dáid virggiin, oažžut vejolašvuođa fállot bistevašvirggi, čilge Kárášjoga Bargiidbellodaga várresátnejođiheaddjievttohas Vivian Boine.
Vásihan váttisvuođaid
Vivian Boine ii loga sin kárten man ollu gaskaboddosašvirggit gielddas leat, muhto lea iežas dálá juristabarggu čađa Riekteveahkkekantuvrras vásihan ollu dákkár váttisvuođaid 10 jagis. Erenomážit gieldda dearvvašvuođasuorggis.
Son čujuha seammás politihkalaš dásis vásihit gaskaboddosašvirggiid bohciidahttit riidduid.
DOVDDASTA VÁTTISVUOĐA: Anne Toril E. Balto ii loga Guovddášbellodagage čuovvulit Ráđđehusa evttohusa, muhto oaidná dehálažžan oažžut bistevašvirggiid olbmuide.
Ávvira vuorkágovva: Anne Rasmus
Dovddasta váttisvuođa
Kárášjoga sátnejođiheaddji Anne Toril E. Balto dovddasta gieldda dearvvašvuođasuorggis leat ollu gaskaboddosašvirggit, nu gohčoduvvon vuorrobargu.
– Mis lei čoavddus dan ođđa hálddahus organiserema ektui, muhto dasa Bargiidbellodat manai vuostá. Nu ahte lea hui ártet go dál ovddidit dan, oaivvilda sátnejođiheaddji.
Ledje čovdosat
Balto lohkáge ođđa vuogádagas leamaš jurdda, go oidnet váttisvuođa ollu gaskaboddosašvirggiin dearvvašvuođa suorggis ja lei sin jurdda oažžut eambo bistevašvirggiid.
Son ii loga Guovddášbellodagage čuovvulit Ráđđehusa evttohusa, muhto oaidná dehálažžan oažžut bistevašvirggiid olbmuide.
– Mis ledje čovdosat gieldda dillái ja Bargiidbellodat galggašii leat mielde gávdnat ovttas čovdosiid, iige dušše cuiggodit, oaivvilda Balto.
