-Almmuhus-
-Almmuhus-
-Almmuhus-
VALÁŠTALLANNannen joavkku ráidočiekčamii

Nannen joavkku ráidočiekčamii

-

-

Diibmá jur gádjo iežaset saji 4. divišuvnnas. Dán jagáš ráidočiekčamiin áigu Nordlys geahččalit beassat guđa buoremusa searvái, go dál sis lea gievrrat joavku go diibmá.

Diibmá golggotmánus čievččai Nordlys Billávuona vuostá kvalifiserema 4. divišuvdnii. Nordlys vuittii, ja nu birgehedje iežaset saji 4. divišuvnnas. Dán jagáš ráidočiekčamiid áigot sihkkarastit buorebut, ja leat ge nannen joavkku diimmá rájes.

 

Ođđa čiekčit


BUORRE DOAIVVA: Nordlys spábbačiekčanjoavkku hárjeheaddjis, Rasmus Sombys, lea buorre doaivva dán jagáš ráidočiekčamii. Son lohká sis gievrras joavkku, ja áigot geahččalit beassat guđa buoremusa searvái. Vuorkágovva: Kari Lisbeth Hermansen

Dán áigodahkii lea Nordlys nannen iežaset spábbačiekčanjoavkku, ja dahkan šiehtadusa ođđa čikčiiguin.

Jan Egil Brekke, Martin Norbye, Mads Petter Utsi, Niillas Henry Nystad, Jon Andreas Rognerud Eira ja Nils Mathis Rognerud Eira leat juo dahkan šiehtadusa hárjeheddjiin, ja leat gergosat vuosttaš čiekčamii.

Rognerud Eira vieljaš guovttos bođiiga juo fárrui loahpas diimmá áigodaga, ja barggaiga buori barggu, lohká Nordlys spábbačiekčanjoavkku hárjeheaddji, Rasmus Somby.

– Lean hui ilus go dát čiekčit leat válljen čiekčat min joavkkus. Brekke ja Nordbye leaba buorit čiekčit, ja lea hárjáneapmi 1. divišuvnnas ja elihtadásis, mii šaddá stuora ávkin, dadjá Somby.

– Mads Petter Utsi boahtá Porsáŋggu joavkkus, geaid mii deaivat vuosttaš ráidočiekčamis dán jagi, ja doaivvun váikkuhit jovkui bures. Ovddeš Álttá čiekči Jon Andreas Rognerud Eira bođii fárrui loahpas diimmá áigodaga, ja barggai buori barggu dalle, ja jáhkán dál maid dahkat dan, lasiha son.

 

Nuorra čiekčit

Nordlys a-joavkkus leat olu nuorra čiekčit. Sullii bealli joavkkus leat nuorra čiekčit, geat aitto leat álgán a-joavkku mielde čiekčat. Somby lea ilus go sis leat olu buorit ja hárjánan čiekčit ovdagovvan nuoraide.

– Sii leat mielde movttiidahttime nuoraid ovdánit ja joatkit spábbačiekčamiin, dadjá son.

 

Guhká juo hárjehallan

Diibmá ii mannan nu bures álgočiekčamiin, muhto luovvanii loahpas. Somby lohká sivvan dasa soaitá leamaš ahte sii álge nu maŋŋit hárjehallat, eai ge danne nákcen bargat nu buori barggu álgočiekčamiin. Dasa lassin nanosmahtte joavkku ođđa čikčiiguin.

– Dán jagi leat álgán árat hárjehallat go diibmá, ja leat juo guhká hárjehallan. Jus čiekčit leat viššalat hárjehallat ja čájehit maid sii máhttet, manašii hui bures, lohká son.

 

Bissut 4. divišuvnnas

Vaikko leat nannen joavkku, de eai leat Nordlys hárjeheaddjis nu alla mihtut vel.

– Váldomihttu lea goit vuos bissut 4. divišuvnnas, ja geahččalit beassat guđa buoremusa searvái, dat orro mu mielas realisttalaš mihttu dál ovdal ráidočiekčamat álget. Ferte oaidnit loahppaáigodaga movt orro manname, ovdal duostá einnostit, dadjá son.

 

Nordlys-Guovdageaidnu

Miessemánu 16. beaivvi deaivvada Nordlys Guovdageainnuin ruovttušilljus. Maŋemus go deaivvadedje, vuoittáhalle Guovdageainnu lunttat.

– Dan ii dieđe movt manaš čiekčamiin. Dán jagi mis lea gievrrat joavku go diibmá lei, nu ahte sávan dieđusge ahte vuoitit, lohká son.

 

Ohcalit olbmuid doarjjan

Vaikko sávvá ahte galggaše lihkostuvvat čiekčamiiguin, de sávvá maid ahte olbmot bohtet geahččat čiekčamiid ja dorjot sin.

 – Sávan ahte olbmot háliidit doarjut min, ja bohtet geahččat min čiekčamiid. Dat lea maid hui dehálaš midjiide jus galgat lihkostuvvat. Dasa lassin sávan ahte buot sámi spábbačiekčanjoavkkut lihkostuvvet dán jagáš ráidočiekčamin, loahpaha Nordlys spábbačiekčanjoavkku hárjeheaddji, Rasmus Somby.

-Almmuhus-