Norsk Luftambulanse vuođđudus dieđiha ahte sii leat nannen fáhkkagearggusvuođa doavtterbiilla anestesidoaktáriin ja guvttiin ambulánssain Arctic Race of Norway gilvui mii lágiduvvo Finnmárkkus borgemánus 17. – 20. beivviid.
– Arctic Race of Norway lea álbmotfeasta. Oassálasti sihkkelastiide, bargiide, eaktodáhtolaččaide ja gehččiide, lea dehálaš ahte gilvvut lágiduvvojit nu dorvvolaččat go vejolaš. Mii leat lohpidan veahkehit dakkaviđe jus oktage roasmmehuvvá dahje buohccá, vai dat ii čuoza guovllu fahkkagearggusvuhtii, lohká Norsk Luftambulanse vuođđudusa váldočálli Hans Morten Lossius.
Norsk Luftambulanse leamaš Arctic Race of Norway gilvvu ovttasbargoguoibmi 2019 rájes.
Arctic Race of Norway sihkkellahttu vuolgá Guovdageainnus ja fitná sihke Álttás, Hámmerfeasttas, Ávanuoris ja moalla lea Davvikáhpa alážis. Leat 18 sihkkeljoavkku ja juohke sihkkelastti sihkkelastá 663 km. Máŋga duháha olbmo lávejit čuovvut mielde go sihkkelastit šuvihit meattá sin. Gilvu bistá njeallje beaivvi ja Norsk Luftambulanse guokte ambulánssa ja okta doavtterbiila čuvvot sihkkelastiid. Guktuid ambulánssain leat báikkálaš ambulánssabargit ja doavtterbiillas lea anestesiijadoavttir ja seammalágan rusttegat go ambulánsahelikopteris.
– Davvi-Norggas leat guhkes gaskkat ja Norsk Luftambulanse vuođđudusa medisiinnalaš gearggusvuođa bokte, šaddá maid Arctic Race of Norway dorvvolaš vásáhus sihkkelastiide ja buohkaide, lohká Dybdal.
Lossius sávvá buori ovttasbargu buot báikkálaš dearvvašvuođasurggiin gos gilvu manná.
