Finnmárkku ja Romssa sávzadoallu lea okta dain buoremusain olles Eurohpás, ja dan áigu Nortura dál val eanet nannet.
Finnmárkku ja Romssa sávzadoallu lea okta dain buoremusain olles Eurohpás, ja dan áigu Nortura dál val eanet nannet.
Oapmedoalus lea stuora geavakeahtes potensiála mielkebuvttadeamis ja spesialiserejuvvon biergobuvttadeamis. Dan dihte leage Nortura ovttas eará berošteddjiiguin álggahan prošeavtta «Lassi roavvafuođđarbaserejuvvon biergobuvttadeapmi Romssas ja Finnmárkkus». Prošeavtta ulbmil lea láhčit dili boanddaide lasihit Romssa ja Finnmárkku biergobuvttadeami, ja rekrutteret ođđa buvttadeddjiid sávza- ja oapmedollui. Galget maid fylkkaide ásahit gálbbiide loahppabiebmanovttadagaid.
Bohččigusat váilot
Oapmedoalu márkandilli lea dovddus. Vuollebáza lassána dađistaga, ja dál importerejit 19 proseantta oapmebiergobuvttadeamis. Vai gokčet boahtteáiggi dárbbuid, de fertejit duppalastit bohččigussalogu boahttevaš logi jagis. Lábbáidlohku gal lea vel nohkka, muhto prognosat čájehit ahte fertejit lábbáidlogu maid lasihit sakka boahtteáiggis.
Galgá oahpahus maid
Ulbmiljoavku leat buvttadeaddjit geat háliidit lasihit omiid, hukset ođđa doaibmavistti, rievdadit/stuoridit dálá doaibmavistti dahje álggahit ođđa roavvafuođđarbuvttadeami. Galget lágiduvvot earret eará fágačoahkkimat ja oahppomátkkit oktan ráđđeaddiiguin. Galgá maid čađahuvvot oahpahus Sávzaskuvllas goappaš fylkkas, ja maiddái álggahuvvot Biergooapmeskuvla prošeaktaáigodagas.
Stuora beroštupmi
Maŋŋel go leat kárten man stuora beroštupmi lea prošektii, de fátmmasta prošeakta Giehtavuona, Harstad, Beardu oktan Sállatgittiin, Leaŋgaviikka, Málatvuomi Báhccavuona, Romssa, Gálssa ja Omasvuona suohkaniid Romssas. Finnmárkkus lea Ávjovári suohkanat Porsáŋgu, Guovdageaidnu ja Kárášjohka mielde prošeavttas. Váldobargu galgá biddjot daidda suohkaniidda, muhto eará suohkanat besset maid searvat.
Kristine Fossli álggii diimmá juovlamánus prošeaktajođiheaddjin dán golmmajahkásaš prošektii, ja lea Nortura SA mii lea prošeaktaeaiggát. Prošeavtta ruhtadit Romssa ja Finnmárkku Fylkkamánnit, Romssa ja Finnmárkku fylkkasuohkanat, Felleskjøpet Agri ja Sámi Ovdánahttonfoanda.
