Sámediggi rahpá ovccát kánturbáikki, dán háve máttasámi guovllus Árbordes.
Sámedikkis leat dál gávcci kánturbáikki Vuonnabađa rájes davvin Snåase rádjai máddin. Giđđat 2020 almmuhuvvojit guokte gaskkusteaddjivirggi mat galget árjjalaččat bargat sámi girjjálašvuođa bagademiin ja gaskkustemiin. Okta virgi galgá Árrana julevsáme guovddážii Hábmeris, gos Sámedikkis lea juo kánturbáiki, ja nubbi virgi galgá ges sámi kultur- ja ovddidanguovddážii Sijti Jarngii Árbordes.
– Lea hui illudahtti go mii gaskkusteaddjivirggiin Árbordes nannet iežamet saji ain eanet máttasámi giellaguovllus. Mii leat ilus go Sijti Jarnge lea sávvan Sámediggái bures boahtima sin guovddážii. Min mielas lea buorre go Sámediggi sáhttá dahkat lávgadit ovttasbarggu sámi aktevrraiguin Árbordes ja birrasis, dadjá Sámedikki direktevra Rune Fjellheim preassadieđáhusastis.
Juohkit máhtu sámi girjjálašvuođa birra
Sámediggi čállá ođđa ásahuvvon gaskkusteaddjivirggit galget bargat árjjalaččat sámi girjjálašvuođa bagademiin ja gaskkustemiin, ja galget buoridit máhtu sámi girjjálašvuođa ja kultuvrra birra girjerádjosiidda, mánáidgárddiide, skuvllaide ja earáide mátta- ja julevsámi giellaguovllus, dávistettiin dievasčoahkkima mearrádusa «Sámi girjjálašvuođa gaskkusteapmi» mii dahkkojuvvui čakčamánus 2018.
Sámediggi áigu giđđat almmuhit guokte virggi.
– Die leat guokte gelddolaš virggi man oktavuođas mii ohcat iešheanalis ja roahkkadis olbmuid geain váibmu coahkká sámi girjjálašvuhtii ja geain lea buolli hállu doaibmat gaskkusteaddjin. Mii illudit fas mannat Árbordii formálalaččat rahpat iežamet ođđa kánturbáikki, seammás go váldit vuostá ođđa mielbargiid, dadjá Sámedikki direktevra.
Sámedikki hálddahus galledii Sijti Jarnge dán vahkus man oktavuođas geahčadeimmet earret eará kánturlanjaid ja ságasteimmet doaimma birra viidáseappot. Vejolaš lea maiddái ahte eará virggit Sámedikki hálddahusas biddjojuvvojit Árbordii go guovddážis lea guoros kánturkapasitehta.
