Guovdageainnu sátnejođiheaddji lohká Norut guorahallamis leat olu diehttelasvuođaid, mat dál leat duođaštuvvon.
Guovdageainnu sátnejođiheaddji lohká Norut guorahallamis leat olu diehttelasvuođaid, mat dál leat duođaštuvvon.
– Duhtavaš ja duhtavaš, guorahallama boađus goittot ge lea oktiisoahpevaš iežamet navdimiiguin. Das leat olu diehttelasvuođat maid leat ožžon duođaštuvvot, lohká Guovdageainnu sátnejođiheaddji Johan Vasara, Norut guorahallama birra mii lea dahkkon Guovdageainnu ja Kárášjoga gielddaid vejolaš ovttastahttima birra.
Geavahit vuođđun áššemeannudeames
Norut guorahallamis lea sámi perspektiiva vuođđun, ja dutkit dan vuođul eai ávžžut dán guokte gieldda ovttastuvvot. Vasara lohká atnit dán ášševuođđun go meannudit suohkanovttastumi suohkanstivrras geassemánu 16. beaivvi.
– Dát guorahallan ja PWC konsuleantafitnodaga guorahallan atno ášševuođđun go gieđahallat ášši, muitala Vasara.
Guokte raportta
PWC fitnodat lea árabus proseassas guorahallan makkár váikkuhusat ja makkár buorit leat jus Guovdageaidnu ovttastahtto Álttá, Láhpi ja Kvænangen suohkaniiguin. Dan raporttas bođii ovdan ahte Guovdageidnui ii soaitte nu ovdamunni ovttastahttot dážasuohkaniin.
Dán raportta maŋŋil dat Guovdageainnu ja Kárášjoga gielddat diŋgojedje guorahallama mas sámi perspektiiva biddjo vuođđun ja mas guorahallo mo livččii dán guokte sámesuohkan ovttastahttit.
Loga maid: Gaskkat ja ruovtturáhkis ássit ággan go eai ávžžut ovttastahttima
– Buorre gullat
Varas guorahallamis boahtá ovdan ahte eai ávžžut dáid ovttastuvvot, muhto baicce nannet ovttasbarggu Ávjováre eamiálbmotregiovnna bokte.
– Lei hui buorre gullat go Norut oaidná seamma vejolašvuođaid go mii. Mis lea máŋgga dásis jo formála ovttasbargu, nu mo IT-suorggis. Dál lea mis dáhttu geahčadit makkár eará surggiin vel sáhttit ovttasbargat, muitala Vasara ja namuha mánáidsuodjalussuorggi vejolaš ovttasbargun.
– Mis lea Guovdageainnus 100 proseantta sámegielat mánáidsuodjalusbálvalus, ja lean ipmirdan ahte Kárášjogas ges váilo diet bealli dien bálvalusas. Nu ahte soaitá dát livččii juoga mainna sáhtašeimmet ovttasbargat, lohká sátnejođiheaddji.
Ostet bálvalusaid divrasii
Norut guorahallama prošeaktajođiheaddji Vigdis Nygaard muitalii Ávvirii eske ahte earret eará plánasuorggis ávžžuha gielddaid ovttasbargat. Dása guorrasa Vasara maid. Son muitala Guovdageainnu suohkana dál oastit olu plánabálvalusaid olggobealde.
– Min plánakantuvra lea rašši dál. Mun lean jo dieđihan ahte fertet eará ládje jurddašišgoahtit dán dáfus. Lea buoret virgádit gelbbolašvuođa go divrasit oastit konsuleanttaid. Sáhttá maid leat lunddolaš ovttasbargat Kárášjogain muhtin plánasurggiin, nu mo meahcástanplánaid ja areálaplánaid dáfus, lohká Johan Vasara.
