Ávvir bivdá lohkkiid evttohit dán jagáš sápmelačča.
Ávvir bivdá lohkkiid evttohit dán jagáš sápmelačča.
Ávvir lea guokte maŋimuš jagi nammadan daid jagiid sápmelačča. Lohkkit leat jienastan su gean sii oaivvildit leat bures ovddidan sámi.
Ovddit jagiid lea doaimmahus geahččan makkár sápmelaččat leat beaggán daid jagiid, ja evttohan namaid maid lohkkit besse jienastit.
Dán jagi besset lohkkit maid evttohit sin geaid sii oaivvildit ánssášit namahusa «Dán jagi sápmelaš 2017».
Evttot namaid
Mii bivdit lohkkiid evttohit gii jagi 2017 sápmelaš galgá leat.
Dán jagáš sápmelaš galgá beaggán miehtá Sámi, ja soaitá vel viidábut. Sápmelaš galgá bargan buori barggu sámeservodaga ovdii, ja soaitá beaggán mediain iežas barggu dahje rahčamuša oktavuođas.
Sádde evttohusa Ávvirii, mas muitalat manne dát olmmoš ánssáša namahusa. Áigemearri sáddet evttohusa lea juovlamánu 1. beaivvi. Sádde evttohusa dán epoasta čujuhussii: redaksjonen@avvir.no .
Juovlamánu 13. beaivvi almmuhat geat leat evttohasat nammaduvvot dán jagi sápmelažžan, ja dan rájes besset lohkkit jienastit su gean oaivvildit galgat vuoitit.
Lullisápmelaš vuosttaš vuoiti
Dál lea goalmmát háve go Ávvir nammada dán jagaš sápmelačča.
Vuosttaš háve, 2015:s, šattai artista Jon Henrik Fjällgren jagi sápmelažžan.
Dan jagi son lei mielde Ruoŧa Melodifestivalenis, ja goasii beassan Eurovision musihkkagilvui.
Son ovddidii luođi ja erenoamážit lulli-sámi luohtevieruid.
Ovddidii dehálaš ášši
Diibmá šattai Marion Anne Knutsen jagi sápmelaš. Sutnje lei čielga vuoitu, go son oaččui beali jienain.
Knutsen lea Divttasvuonas eret, ja bekkii jagi 2016 olu, go son čuvgehii rohcošemiid Divttasvuonas, mat galget jahkeviissaid dáhpáhuvvan.
Son šattai ovtta ládje ovdagovvan dan áššis, go rahpasit muitalii maid ieš lei vásihan gilážis.
Maŋŋil leat olu áššit boahtán ovdan, muhtun áššit leat dikkis leamaš, eará áššiid leat ain dutkame.
