-Almmuhus-
OĐĐASATNammaduvvon Romssa universitehta gudnedoavttirin

Nammaduvvon Romssa universitehta gudnedoavttirin

-

-

– Lean guhká leamaš studeantan luonddu universitehtas, ja dainna duogážin vuostá válddán dán nammadeami, lohká Mari Boine gudnedoavtternamahusa birra man oažžu Romssa universitehtas.

Nobelbálkkašumi vuoiti Arieh Warshel, ​Spellemannbálkkašumi vuoiti Mari Boine, máilmmi dearvvašvuođa áŋggirdeaddji Richard Horton ja universitehta njunuš Olav Holt leat njealjis geat leat nammaduvvon Romssa universitehta gudnedoavttirin

– Sii leat buohkat iežaset fágasuorggis birgen bures. Sin buohkaid bargu lea váikkuhan ja ain váikkuha earáid, lohká Romssa universitehta rektor Anne Husebekk preassadieđáhusas.

 

50 jagi

Romssa universitehtas lea 50 jagi ávvudeapmi, ja dan oktavuođas lea stivra nammadan njeallje ođđa gudnedoaktára. Dábálaččat leat okta, guokte dahje golbma.

– Earenoamáš ávvudemiin mii sáhttit nammadit vel guokte lassi gudnedoaktára. Dán jagi mii geavahit 50 jagi ávvudeami liiban nammadit njeallje, lohká Husebekk.

 

Luonddu ja máttuid universitehtas studeantan

Universitehta rámida Boine go son lea ovddidan sámi kultuvrralaš ja gielalaš vuoigatvuođaid, ja iežas musihkain lea sámegiela dolvon buot máilmmi čiegaide. 

– Min máttuid viissisvuohta ja luonddu viissisvuohta lea sierra universitehta. Lean guhká leamaš dan universitehta studeanta, vuollegašvuođain. Ii sáhte buot mihtidit oahppočuoggáiguin. Dainna duogážiin vuostá válddán gudnedoavtternammadeami, lohká Mari Boine preassadieđáhusas. ​

 

Čakčat nammadit 

Allaáiggálaš gudnedoavtternammadeapmi lea ávvudeami oktavuođas čakčamánu. Buot njealjis bohtet Romsii oažžut dán nammadusa. 

– Gudnedoavtterhas lea olmmoš gii lea mávssolaš dieđálaš dahje dáiddalaš barggu bargan, bures ovddidan dáidaga dahje dieđalašvuođa, dahje osiid dahje barggu mii lea mávssolaš universitehtaservodahkii, čállá Romssa universitehta preassadieđáhusas.

 

– Ođastan juoigama

Mari Boine lea okta njealljásis gii dán namahusa oažžu. 

– Mari Boine lea ođastan juoigama. Iežas sajis Sámis olaha máilmmi. Son ovttasta sámi árbevieru innovatiiva ja ođđaáigasaš musihkain, ja su musihkka deaivá olbmuid iešguđet musihkka- ja kulturduogážiin, čállá universitehta preassadieđáhusas Boine birra. 

Sii namuhit bálkkašumiid maid lea ovdal ožžon, earret eará Davviriikkaid ráđi musihkkabálkkašumi 2003:s, St. Olava Ortnega 1. luohká riddár 2009:s. Dasa lassin lea njeallje Spellemannbálkkašumi vuoitán, ja dán jagi oaččui Spellemann gudnebálkkašumi. 

-Almmuhus-