Laila Susanne Vars lea nammaduvvon IWGIA stivraláhttun. Vars illuda go arktalaš ja sámi jietna maid gullogoahtá riikkaidgaskasaš olmmošvuoigatvuođaid ja álgoálbmotrivttiid organisašuvnnas.
Laila Susanne Vars lea nammaduvvon IWGIA stivraláhttun. Vars illuda go arktalaš ja sámi jietna maid gullogoahtá riikkaidgaskasaš olmmošvuoigatvuođaid ja álgoálbmotrivttiid organisašuvnnas.
Laila Susanne Vars lea nammaduvvon stivraláhttun IWGIA (Riikkaidgaskasaš bargojoavku álgoálbmotáššiin) organisašuvdnii.
IWGIA lea internašunála olmmošvuoigatvuođaid organisašuvdna, gos spesialistat ja ráđđeaddit barget álgoálbmot áššiiguin.
Sii barget ovddidit álgoálbmot áššiid, iešmearrideami, olmmošvuoigatvuođaid, eananvuoigatvuođaid, kultuvra iehčanasvuođa ja ovdánahttima oktavuođas.
— Lea hui stuora gudni go beasan leat mielde dákkár orgánas mii bargá miehtá máilmmi álgoálbmot rivttiiguin. Sávvamis boahtá ávkin Sápmái maid, lohká aitto nammaduvvon IWGIA stivraláhttu Laila Susanne Vars.
Arktalaš jietna
Vars čilge ahte son lea válljejuvvon IWGIA stivrii go sus lea juridihkalaš duogáš, máhttá olmmošvuoigatvuođaid, lea leamaš nuppástuhttinproseassain mielde, ja go lea sápmelaš.
IWGIA neahttasiidduin čuožžu ahte sin váldoguovllut leat Afrihká, Asia, Lulli-Amerika ja Ruošša.
— Árvidan ahte leat válljen mus jearrat go mus lea politihkalaš ja fágalaš duogáš maid dárbbašit ja háliidit. Sii háliidit nannet davviriikkalaš fokusa maid. Sii háliidit maid rievdadit doaimmaid, ja árvidan go beasan mielde stivrii, de beasan váikkuhit maid bargat. Mu vuolggasadji lea davviguovlluin ja mu riektemáhttu lea čadnon sámi áššiide, ja arktalaš jietna gullo eambbo go mun lean mielde stivrras, lohká Vars.
Sápmelaččaide ávkin
IWGIA doaimmat lea čalmmustahttit álgoálbmot áššiid, ovddidit álgoálbmot gažaldagaid stáhtaid ektui, ja muđui vuoigatvuođa áššiid čuollat, dainna lágiin buoridit álgoálbmogiid dili máilmmis.
— Lea sápmelaččaide ávkin go sápmelaččat leat riikkaidgaskasaš doaimmain mielde. Álo go sámi olmmoš válljejuvvo doaimmaide, de buktá juoidá buori Sápmái. Min riektedilli ja hástalusat čalmmustahttojuvvojit. Munnje mearkkaša olu, ja jáhkán boađán oahppat olu, ja fágalaččat beasan ovdánit, lohká Laila Susanne Vars.
Áigu vuos oahpásmuvvat organisašuvdnii
Stivra lea IWGIA bajimus orgána mii mearrida makkár doaimmat galget jođus.
Organisašuvdna lea nuppástuhttin proseassas, ja áigot eambbo nannet olmmošvuoigatvuođaid. Ovdal sin doaibma lea leamaš ovdánahttin, ovttasbargu álgoálbmogiin, diehtojuohkin ja ráhkadit čállosiid ja publikašuvnnaid.
Laila Susannes leat vuordámušat beassat váikkuhit iežas máhtuin eará álbmogiid dili. Vars lea ge oahpis nuppástuhttinprosessii, go lei ovddeš Gáldu direktevra, ovdal go Gáldu ja Norgga Nationála Olmmošvuođaid Ásahus(NIM) oktiičaskojuvvuiga.
— Mun háliidan vuos oahpásmuvvat IWGIAi, ja háliidan oaidnit makkár bálgá áigot guorrat. Ii leat jurdda ahte stivra galgá eaŋkiláššiid loktet, muhto eambbo movt IWGIA galgá doarjjan álgoálbmogiidda, vai galget oažžut dohkkehuvvot olmmošvuoigatvuođaid. IWGIAs lohke maid oalle čielgasit ahte áigot strategalaš olbmo gii nanne sin gelbbolašvuođa, mun dovddan ovddasvástádusa bearráigeahččat buot álgoálbmogiid, lohká Vars.
