Beakkán sámi artista Mari Boine lea nammaduvvon Luonddugáhttensearvvi ođđa gudnemiellahttun.
Luonddugáhttensearvvi riikastivrra lea mannan vahkkoloahpa ovttajienalaččat nammadan Mari Boine ja Finn Otto Kvilum ođđa gudnemiellahttun. Eavttut leat ahte olmmoš galgá ovddidan Luonddugáhttensearvvi ulbmila.
Mari Boine oažžu dan ánssu go son lea guhkit áigge bealuštan luonddu ja álgoálbmogiid vuoigatvuođaid. Mari lea máilmmidovddus musihkkár, guhte lea addán vearditmeahttun doarjga ja lokten sápmelaččaid iešdovddu ja ráhkisvuođa Sápmái, čállá Luonddugáhttensearvi sin neahttasiiddus.,
– Mari lea buot máilmmi álgoálbmogiid erenoamáš ambassadevra ja son lokte rahčamušaid luonddubilistemiid vuostá Sámis, nu daddjo vuođuštusas.
