Olusiidda mearkkaša dálveluopmu guhkes biilamátkkit. Olusat bidjet julggiid dashbeavddi ala vuoiŋŋastan dihtii. NAF rávve garrasit ale nie bargga.
– Mii áddet dieđusge ahte olbmot háliidit vuohkkasit čohkkát biilamátkkis. Muhto bidjat julggiid dashbeavddi ala, ii leat buorre čoavddus, lohká NAF dahje Norgga automobiilla lihtu neavvu Jan Harry Svendsen.
Váttisvuohta lea oktiibeaškkehanguoddá. Jus lihkohisvuohta dáhpáhuvvá, de dieviha oktiibeaškkehanguoddá jođánit áimmuin hirbmat deattuin ja leavttuin. Jus juolggit leat dashbeavddi alde, de sáhttá olmmoš bahát roasmmehuvvat. NAF dieđuid mielde ii doaimma biilaboagán nu mo galgá jus juolggit leat dashbeavddi alde.
–Ođđaáigásaš biillain lea hirbmat olu sihkkarvuođaáđat. Das leat čavgenboahkánat, oktiibeaškkehanguottát ja biilastuolut mat leat ráhkaduvvon várjalit olbmo jus lihkohisvuohta dáhpáhuvvá. Jus ii čohkká nu mo galggašii, de eai doaimma dát ráhkkanusat mat galggašedje olbmo várjalit, lohká Svendsen.
NAF váruha maid bidjat bođu dávviriid dashbeavddi ala, go dat hehtte oaidnima vuojedettiin ja muosehuhttá biilavuoddji, ja sáhttet maid leat váralačča jus oktiibeaškkehanguoddá dieviha.
