14 jahkái eai leat nu unnán finnmárkulaččat leamašan barggu haga go dál leat.
Finnmárkkus lea bargguhisvuohta njiedjan 19 proseanttain, go buohtastahttá cuoŋománu dán jagi seamma mánuin diibmá.
Finnmárkkus ledje mannan mánu 1149 olbmo áibbas barggu haga, ja dat lea 2,9 proseantta bargoveagas.
Ná vuollin ii leat bargguhisvuohta Finnmárkkus leamašan 2004 rájes.
Muđui riikkas lea bargguhisvuohta dál 2.4 proseanta.
Olu čilgehusat
Leat máŋga čilgehusa manne bargguhisvuohta lea ná njiedjan, muitala NAV Finnmárkku márkanráđđeaddi Steinar Mauset preassadieđáhusas:
– Cuoŋománu statistihkas oaidnit ahte leat unnit olbmot barggu haga guolástus- ja industriijasurggiin. Sin lohku geat leat gaskaboddosaččat bággoluomus lea maid njiedjan. Loguid mielde orru guolástusealáhusas leamašan buorre giđđa, sihke meara alde ja gáttis.
Eanet huksenbarggut
Mauset lohká maid ahte leat unnit huksen- ja fidnobargit geat leat dieđihuvvon barggu haga, ja dasa lea čilgehus ahte leat eanet doaimmat dán suorggis giđđat.
Son lohká vel ahte sii oidnet dál ahte leat eanet rabas virggit mátkkoštanealáhussuorggis ja fievrredansuorggis.
Dat čájeha ahte turistaealáhusat leat leat ráhkkaneame ođđa áigodahkii ja virgádit olbmuid.
Várggáin eanemus olbmot barggu haga
Finnmárkku 19 suohkanis njiedjá bargguhisvuohta 12 suohkanis.
Ákŋoluovttas (Hasvik) ja Unjárgga gielddas lea unnimus bargguhisvuohta (1,9 proseantta).
Alimus bargguhisvuohta lea Várggain (4,9 proseanta).
Maiddái doppe lea bargguhisvuohta njiedjan 18 proseanttain diimmá cuoŋománu loguid ektui.
Finnmárkku sámi suohkaniid bargomárkanlogut cuoŋománu 2018
Áibbas barggu haga sámi suohkaniin:
| Gallis | % bargoveagas | Rievdadus diimmáža rájes | |
| Guovdageaidnu | 73 | 4,8 | -21 |
| Porsáŋgu | 64 | 3,2 | 8 |
| Kárášjohka | 42 | 2,7 | -29 |
| Deatnu | 41 | 1,9 | 0 |
| Unjárga | 8 | 1,9 | -11 |
