Sáhpán ii dárbbaš go 7 millimehter stuoru ráiggi ovdal čáhká suotnjat čađa. Jus oaivi čáhká, de čáhká olles gorut ráigeráigge.
Sáhpán ii dárbbaš go 7 millimehter stuoru ráiggi ovdal čáhká suotnjat čađa. Jus oaivi čáhká, de čáhká olles gorut ráigeráigge.
Go olgun čoaskugoahtá, de álget sáhpánat bahkket vissui. Newswire ođasdoaimmahat čilge movt sáhttá eastadit sáhpániid beassamis vissui, ja maid galgá dahkat jus sáhpán lea beassan vissui, dahje áitái.
– Dássážii gal lea sáhpániin leamaš buorre dilli, muhto go bihcugoahtá eana, de lea váddáseappot sáhpániidda gávdnat biepmu. Ruksessáhpánat eai birge jus eai gávnna liegga báikki dálvái, lohká Jonas Hemmingsson, Bayer Garden buvttadanhoavda.
Bahkke vissui
Vuovdesáhpán sáhttá birget jus ráhkada biejuid muohttaga vuollái, muhto ruksessáhpán ii birge jus ii beasa vissui dahje eará vistái.
– Leat erenoamážit barttat ja áittit gosa sáhpán viggá. Doppe sáhttá boaldinmuoraid sisa ráhkadit bieju. Sáhpán sáhttá maid viessoskoađđasa sisa mannat, ja ráhkadit bieju, lohká Hemmingsson.
Daid jagiid goas leat olu sáhpánat, lea vel váddáseappot sáhpániidda gávdnat dálvesuoji. Daid jagiid sáhttá vel vuovdesáhpán ge bahkket visttiide.
Jávkadit sáhpána
Čakčat ožžot, sii geat jávkadit vahátelliid, hui olu gohččumiid boahtit duokŋat viesuid vai sáhpánat eai beasa sisa.
Dan sáhttá neahtain, huksensorppiin dahje silikovnnain.
Jus ii sáhte duokŋat doarvái bures, de sáhttá mirkkuid dahje gilláriid adnit.
– Jus leat duššo moadde sáhpána de ávžžuhan gilláriin vuos geahččalit oažžut daid eret. Jus das ii oro ávki, de ferte mirkkuin geahččalit. Dat mii de lea dehálaš lea ahte mánát dahje viessoeallit eai gávnna mirkkuid. Maŋemuš jagiid leat čavgen gáibádusaid sáhpán- ja roahttomirkkuide Norggas, ja lea dábálaš šaddan bidjat mirkkuid sierra doasaide maid sáhpán gávdná, lohká Hemmingsson.
Son lohká ahte dat veahttaseamos mirkkot dollet go galgá sáhpániid jávkadit, go dalle maid ii leat várra ahte eará eallit ožžot mirkkuid jus borret sáhpána.
