-Almmuhus-
-Almmuhus-
OĐĐASAT Ná rávve Fylkka­mánni boazo­dolliid bargat korona­áiggis

Ná rávve Fylkka­mánni boazo­dolliid bargat korona­áiggis

-

-

Ollugat leat dál gárddástallamin, ja dan bargodilis sáhttá dávda álkibut njoammut.

Lea mávssolaš, ahte buohkat čuvvot eiseválddiid njoammuneastadanrávvagiid, dieđiha Fylkkamánni. 

– Mii ávžžuhit ahte buot boazoeaiggádat, siidaosiid jođiheaddjit ja orohagaid olbmot jurddašit mo bargguid doaimmahit nu ahte njoammunvárra lea nu unni go vejolaš.

Gárddástallamis 

Gárddástaladettiin ii leat buot háviid nu álki doallat gaskka bargoguimmiide.  Fylkkamánni ávžžuha ráddjet gárddástallamiid dan muddui go lea vejolaš.

– Barggu berre doaimmahit lagamus bargoguimmiiguin, ja nu ahte it leat lagaš oktavuođas badjeolbmuiguin dahje earáiguin geat eai gula orohahkii. Čállet áinnas logga, mii čájeha geat leat gárddis, nu ahte lea álkit guorrat vejolaš njoammuma, dieđihit sin neahttasiiddus. 

Eará rávvagat

Romssa ja Finnmárkku Fylkkamánni ávžžuha maid ráddjet deaivvademiid earáiguin ja doallat gaskka. 

– Ráddje nu bures go vejolaš deaivvademiid singuin geat eai gula bearrašii ja lagamus bargoguimmiide.  Fina guossis nu unnán go sáhtát, earenoamážit dakkár olbmuid luhtte geat gullet riskajovkui. Geavat molssaevttolaš dearvvahanvugiid gieđain buorastahttima ja salasteami sajis. Doala unnimustá mehtera gaskka olbmuide – áinnas eanetge.

Guođuhanbárttas

Romssa ja Finnmárkku Fylkkamánni ávžžuha maid ahte jos orut guođohanbarttas dehe lávus, de ráddjet dan geavahusa lagamuš bearrašii dehe jovkui.

– Láže vejolašvuođaid gieđaid bassamii ja ane gieđaid desinfiserenávdnasa olámuttos. Geavat teknologalaš veahkkeneavvuid veahkkin, nu ahte sáhttibehtet doallat gaskka. De desinfisere gieđaid ja reaidduid dávjá ja vuđolaččat, earenoamážit go leat leamaš olbmuid siste ja searvan bargguide. 

Giehtadesinfiserenávdnasat

Dasa lassin ávžžuha geavahit giehtadesinfiserenávdnasa, jos sáibu ja čáhci ii leat olámuttos.

– Sihko dávjá giikara ja gulahallanreaidduid. Geavat maiddái iežat niibbiid, suohpaniid, basttaid ja nu ain, ja ane daid nu buhtisin go sáhtát. Jus muhtumat leat buohccit, de fertejit orrut ruovttus, čállá Romssa ja Finnmárkku Fylkkamánni iežaset ruovttusiiddus. Eanet dieđuid ja rávvagiid gávnnat dás. 

-Almmuhus-