Vuosttaš jándora Giđđajohtin minuhtas minuhttii sáddagis čájehit gehččiidlogut ahte ledje 80.000 olbmo geat gehčče sáddaga Tv:es, ja 55.000 neahta bokte.
Vuosttaš jándora Giđđajohtin minuhtas minuhttii sáddagis čájehit gehččiidlogut ahte ledje 80.000 olbmo geat gehčče sáddaga Tv:es, ja 55.000 neahta bokte.
NRK Sámi sáddágis Giđđajohtin minuhtas minuhttii ledje oktiibuot birrasiid 135.000 olbmo geat čuvvo sáddaga vuosttaš jándora.
Alimus lohku goassige
Nrk Sámi almmuhanredaktevrra Pål Hivand muitala ahte leat birrasii 40 000 ovttaskas geahčči čuvvon neahta bokte, ja 15.000 streama bokte.
– Go mii leat vuosttaš geardde mielde lágideames dákkár njoazes-tv, de eat dieđe man ollu gehččiid galgat vuordit. Muhto 40 000 ovttaskas geahčči lea alimus lohku mii mis lea goassige leamaš min neahtta-tv bokte, ja seammás leat oaidnán min neahttaságastallamis ja sosiála mediain ahte olbmot liikojit dasa. Dan ahte ledje 80.000 geahčči dábálaš TV:es, ja ferte maid muitit ahte NRK2 kanála ii leat váldokanála, de leat dáiiguin loguiguin hirbmat duhtavažžat.
Olbmot čállet sii ledje vuordán erenoamáš govaid beassat oaidnit ja lea hui illudahtti go dát gehččiidlogut orrot čájeheame ahte leat olahan dan, lohká Hivand.
Ekstrema njoazes-tv
Hivand lohká dát gehččiidlogut sáhttet maid muitalit ahte go maŋŋonedje sáddagiin, ja šadde vuordit, de soaitá ođasberoštupmi geasuhan.
– Seammás vuosttaš eahkeda lei ekstrema njoazes-tv go ii dáhpáhuvvan ii mihkkege, ja olbmot liikká gehčče. Otná beaivvi mielde, go johttájit, ja juoga álgá dáhpáhuvvat, de lea mis doaivva ahte eanet geahččit čuovvugohtet sáddaga, lohká Hivand.
Ii dáhpáhuva dávjá
Hivand muitala maid ahte sii mearkkašit sosiála mediain juogadit olbmot govaid go leat TV:s geahččame giđđajohtinsáddaga.
– Ii leat nu dávjá ahte olbmot dahket dan, ja nu orrot ge deaivan ulbmila njuolga gasku, namalassii gaskkustit sámi kultuvrra máilbmái.
– Mis eai leat vel logut gos máilmmis čuvvot sáddaga, muhto min neahttaságastallamis leat oaidnán ahte olbmot gehččet Japánas, New Yorkas ja Eurohpás. Go dál johttájit ealuin ja eanet dáhpáhuvvagoahtá ja bohtet buoret govat oktan musihkain, de jáhkkit gehččiid lassánit riikkaidgaskasaččat maid, lohká almmuhanredaktevra Pål Hivand.
Bálkestan álgoplánaid
NRK Sámi prográmmaredaktevra Ole Rune Hætta lea Fála siidda mielde johtime, ja muitala sis leat sáddagiin leamašan veaháš teknihkalaš hástalusat vuosttaš jándorbeali, go ii leat buot plánaid mielde.
– Álgoplánaid mii gal leat áigá bálkestan, ja dál leat mis máŋga plána maid sáhttit čuovvut. Dál lean dáppe siiddas ja dáppe mun in dieđe nu ollu movt sátta váldo vuostái, muhto lean gullan ságaid ahte olbmot leat liikon dasa, lohká Hætta.
Giđđajohtin lea Nrk 22. sátta minuhtas minuhttii buvttadeapmi. Ruođuid siste logut galle geahčči fitne geahččame sáddaga oktiibuot.
2009 – Bergensbanen (1,2 miljovnna)
2010 – Flåmsbana ( 500.000)
2011 – Holmenkollbanen
2011 – Hurtigruten (3,2 miljovnna)
2012 – Telemarkskanalen (1,3 miljovnna)
2012 – Lakseelva (1,6 miljovnna)
2012 – Nordlandsbanen (1,2 miljovnna)
2013 – Nasjonal Vedkveld (1 miljovnna)
2013 – Sommerbåten (629 000)
2013 – Nasjonal strikkekveld (1 miljovnna)
2014 – 200 år på 200 minutter (700 000)
2014 – 1814 på 24 timer (699 000)
2014 – Piipshow (243 000)
2014 – Salmeboka (2,2 miljovnna)
2015 – Krig på 200 minutter (238 000)
2015 – Sommerbåten
2016 – Saltstraumen (1 miljovnna)
2016 – Fuglefjellet Hornøya (1,7 miljovnna)
2016 – Hele Norge bygger (516 000)
2016 – Skibladner (1,8 miljovnna)
2016 – Ribba – grad for grad (600 000)
Gáldu: Nrk.no
