Go Sáltoduoddara nieida lávllui vuohččan almmolaččat, de darvehii su ustit dán filbmii. Musihkkabihttá lea almmuhuvvon interneahtas ja olbmot rámidit su. Dál dáhtu eambbo lávlut. Geahča ja gula Elin Kristina Oskal «I See Fire» šuoŋa man lea heivehan sámegillii.
Go Sáltoduoddara nieida lávllui vuohččan almmolaččat, de darvehii su ustit dán filbmii. Musihkkabihttá lea almmuhuvvon interneahtas ja olbmot rámidit su. Dál dáhtu eambbo lávlut. Geahča ja gula Elin Kristina Oskal «I See Fire» šuoŋa man lea heivehan sámegillii.
Elin Kristina Oskal lea mánnávuođa rájes lávlon, muhto easka 19-jahkásažžan lávllui vuosttaš gearddi almmolaččat. Skuvlaloahpaheamis ovdanbuvttii son Ed Sheeran beahkkán lávlaga «I See Fire», man lea rievdadastán ja heivehan sámegillii. Son gohčoda lávlaga «Dus lea fápmu».
– Lean rievdadan teavstta olu, dál lea lávlla eanet filosofalaš ja galgá veahkehit olbmuid heajos beivviid. Mu teaksta galgá muittihit olbmuid ahte sis lea fápmu, čilge son.
Lávlla riegádii dálvet
Elin Kristina lea eret Sáltoduoddaris, Nordlánddas. Golbma maŋimuš jagi lea vázzán joatkkaskuvlla Johkamohkis, Ruoŧas. Mannan dálvvi jearai sin oahpaheaddji háliida go okta ge lávlut Johkamohkkimárkana sámedánssas.
– Dán mun háliidin. Vahkku ovdal márkaniid šaddagođii hoahppu, ja čohkkájin ija čállindihti guokte lávlaga. Mun liikon divttaid čállit, nu ahte manai bures heivehit teavstta dan lávlagiid. Johkamohkkimárkaniin in beassan lávlut, go hoteallas ledje vajálduhttán ordnet mikrofuvnna. Go dál galggaimet loahpahit skuvlavázzima, de jurddašin ahte livččii somá lávlut, muitala Elin Kristina.
Unnán hárjehallan
Go 19-jahkásaš fuomášii ahte háliida lávlut, de bivddii soames ustiba čuojahit gitára. Son ii gárron vuos čuojahit, muhto guokte beaivvi ovdal loahpaheami logai ahte sáhttiba geahččalit.
– Go gulai mu lávlumin, de logai ahte háliida čuojahit. Šadden unnán hárjehallat. Mun lávlon veahá vearrut, muhto in mun beroštan das go ledjen duostan lávlut almmolaččat. Mus lei buorre dovdu lávddis.
Olbmot rámidit
Su olmmái darvehii Elin Kristina vuosttaš almmolaš ovdanbuktima lávddis, ja filmma lea almmuhan YouTube neahttabáikkis. Oallugat leat jo geahččan filmma ja dán juogadit maiddái sosiála mediain.
– Máŋggas leat čállán munnje dieđuid Facebookas, sii dadjet ahte lean čeahppi. Lea hui somá gullat go olbmot rábmojit. In jáhkkán ahte nu olu olbmot gehččen dán ja juogadit dan. Nu ahte dát lei hui somá, lohká Elin Kristina.
Movttiidahttá viidáset lávlut
Musihkas lea stuora mearkkašupmi su eallimii, ja son muitala ahte lávlloda dávjá.
– Mun álo lávllun ruovttus. Musihkka lea mu astoáiggedoaibma. Olbmuid rámi geažil háliidan eambbo lávlagiid ráhkadit. Go olbmot rámidit mu, de háliidan joatkit musihka ráhkadit, áigumuš lea iežan lávlagiid čállit ja ieš daidda bidjat šuoŋa, čilge Elin Kristina Oskal.
Sámegillii
Lávlagii man ovdanbuvttii skuvlaloahpaheamis lea Elin Kristina maiddái heivehan luođi. Su mielas heive oarjemáilmmi musihkkii juoigat. Go dál čálligoahtá iežas lávlagiid lea maiddái sámegiella guovddážis.
– Lea váttis sámegillii čállit, muhto dattege lea álkit dovdduid čilget iežas eatnigillii, loahpaha Oskal.
Geahča video: Elin Oskal – Dus lea fápmu. Filbmen: Emma Omma.
