Olusiid mielas lea váttis birget. Mii heivešii velá buorebut go rávvagat mo gallánit vátna ruđaiguin, iige čuoza olbmuid dearvvašvuhtii?
– Jus čuovvu Dearvvašvuođadirektoráhta rávvaga borrat «5 beaivái» šattu ja ruotnasa, de lea ieš mielde geahpedeamen riskka fáhtehallat váibmo- ja varrasuotnavigi ja eará borasdávdda šlájaid. Mii diehtit maid ahte borrandáhpi lea hirbmat dehálaš bisuhit sihke rumašlaš ja psyhkalaš dearvvašvuođa. Danin lea dehálaš ahte ruhtadilli ii geahpet šaddo- ja ruotnasaoastima, lohká Šattuid ja Ruotnasiid diehtojuohkinkantuvrra borramušneavvu Iselin Bogstrand Sagen preassadieđáhusas.
Jagi 2020 rehkenastui ahte Norggas bálkesta juohke 4-olbmo dállodoallu 160 kilo borramuša mii máksá sullii 10 000 kruvnna. Nu mo borramušgálvu lea divron, de mákset dál dat seamma borramušgálvvat mealgat eanet.
Ruđaid seastá
– Dan sadjái go bálkestit ruđaid njuolga doapparlihttái, de sáhttá daid ruđaid baicce geavahit máksit fásta goluid, lohká son.
Borramušneavvu Iselin Bogstrand Sagen lohká ahte šattuin ja ruotnasiin lea olu sáras mii dahká ahte ii dovdda nealggi nu jođánit. Son muitala ahte dearvvašvuođa ja ruđaseastima dihtii gánnáha šattuid ja ruotnasiid borrat ja dat leat maid hálbbit go biergu ja guolli.
Vihtta seastinrávvaga
Borramuša vuođđu berrešii leat kálla, lávki, buđet ja rušpi, go dat lea álbmás ja hálbbes borramuš maid sáhttá borrat lassin eará borramušaide. Ovdal go gávppašat, pláne ja čális borramušlistu ja geavat maid borramušbázahusaid. Dárkkis kilohatti, muhto vállje álbmás buktagiid nu go rohkkaláibbi ovdalii nisoláibbi. Ále gávppaš nealgečovjjiin. Bealli maid borat, berrešedje leat šattut ja ruotnasat vai gallánat, amas dárbbašit ruŋkkistit borrama maŋŋá.
