Sierra gihppaga bokte galget dearvvašvuođabargit oahppat eanet das mo sámi vuorrasiiguin galgá bargat.
Sierra gihppaga bokte galget dearvvašvuođabargit oahppat eanet das mo sámi vuorrasiiguin galgá bargat.
– Buohkain lea riekti oažžut dásseárvosaš dearvvašvuođa- ja fuollabálvalusfálaldagaid, makkár dávda, orrunsadji, ekonomiija, sohkabealli, šaddanriikka, etnisitehta dahje eallindilli dal de leaš guđesge, dadjá Ovdamorašdutkama guovddáža fágalaš jođiheaddji Davvin, Torunn Hamran, UiT Norgga árktalaš universitehta preassadieđáhusa bokte.
Son oaivvilda ahte jus sámi vuorrasat galget oažžut buori dearvvašvuođa- ja fuollafálaldaga, de gáibiduvvo sámi giella- ja kulturgelbbolašvuohta, dasa lassin ferte dearvvašvuođabargiin maid máhttu historjjálaš ja sosiála beliid birra mat sáhttet čuohcat ovttaskas olbmuid eallindillái.
Danne lea son ovttas iežas bargoguimmiiguin ráhkadan fáddágihppaga dearvvašvuođabargiide, oassin 2015 Demeansaplána áŋgiruššamis.
Dearvvašvuođadirektoráhtta lea diŋgon sis gihppaga, ja dál lea dat gárvvis juohkinláhkai.
Joatkka
Fáddágihppagiin leat bargan 2014:i miessemánu rájes, ja dat lea joatkka «Golmmajahkásaš áŋgiruššamat sámi dearvvašvuođa- ja fuollabálvalusain (IS-2052)»-bargui, mii dahkkui Dearvvašvuođadirektoráhta bokte 2010-2012:s.
– Ráhkadettiin gihppaga ledje almmus dieđut iešguđet gálduin, min vuolggasadjin. Min bargu lea leamaš válljet, heivehit ja almmusindahkat dáid. Viiddis referánsajoavku mii lea lohkan, kommenteren, digaštallan ja buktán njálmmálaš ja čálalaš cealkámušaid, lei midjiide stuorra doarjjan, dadjá Postdoavttir Bodil Hansen Blix.
Sávvet digaštallama
Referánsajoavkkus ledje ovddasteaddjit Sámedikki vuorrasiidráđis, buhcciidruovttuin ja ruovttubálvalusain, allaskuvla- ja universitehtasektoris, sámegiela hálddašanguovllu gielddain, Tromssa Fylkkamánnis, Našunála minoritehtadearvvašvuođa gealboguovddážis ja Finnmárkku sámi álbmoga ovdánahttinguovddážis.
Dál sávvaba Hamran guovttos Hansen Blixain ahte dat geat barget sámi vuorrasiiguin, logašit gihppaga ja geavahivčče iežaset vásáhusaid digaštallamiin.
– Miehtá riikka ásset olbmot geain lea sámi duogáš. Dálá vuorrasat leat vásihan dáruiduhttima ja ahte sápmelaččat leat stigmatiserejuvvon. Dát lea oassi min historjjás man eai dovdda miehtá riikka. Olu dearvvašvuođabargiin lea unnán máhttu sámeservodaga birra. Mii leat geahččalan deattuhit ahte sámi vuorrasat lea máŋggabealat joavku. Sámi vuorrasat gullet buot servodatdásiide, virggiide ja oahppojoavkkuide, ja ásset buot osiin riikkas, dadjaba soai.
