Jus áiggut iskat máhtat go vuodjat, de geahččal goit 200 mehtera vuodjat. Logut čájehit ahte juohke goalmmát norgalaš ii máhte vuodjat dan mađe guhkás.
– Norggas eai máhte mánát ja rávisolbmot vuodjat seamma bures go ránnjáriikkain, lohká Redningsselskapet organisašuvnna heavvananeastadeami fágahoavda, Tanja Krangnes.
Frende dáhkádusfitnodat dieđiha Norstat ođđa iskkadeami bokte ahte okta goalmmádasoasis eai máhte vuodjat guhkkelii go 200 mehtera.
Jus galggat árvvoštallot ahte máhtát go vuodjat de fertet máhttit 200 mehtera vuodjat.
Iskkadeapmi čájeha earret eará ahte 21 proseanta eai máhte vuodjat eambbo go 200 mehtera, 13 proseanta lohket sii máhttet vuodjat, muhto eai nagot 200 mehtera. 3 proseanta fas lohket sii eai oba máhte ge vuodjat.
– Go okta goalmmádasoasis eai máhte vuodjat eambbo go 200 mehtera lea balddihahtti. Leat beare olu heavvananlihkohisvuođat juohke jagi, lohká Frende dáhkádusfitnodaga doavttir ráđđeaddi, Helge Skjerven.
Dievddut árvvoštallet iežaset boastut
Redningsselskapet loguid mielde čájehuvvo ahte dán rádjái suoidnemánus, leat gávccis heavvanan. 41 olbmo heavvanedje olles jagis 2022:s.
Diibmá fas dušše 75 olbmo heavvananlihkohisvuođain Norggas, ja 87 proseanta dain ledje dievddut. Frende iskkadeami vástádusaid bokte, lei dievdduin eambbo iešluohttámuš alcceseaset go nissonolbmuin.
– Statistihkka čájeha áibbas eará. Orro ahte dievddut árvvoštallet iežaset vuodjanmáhtu olu buorebun go lea, lohká Skjerven.
Eatnašat geat dušše diibmá ledje badjel 60 jahkásaččat.
Heavvaneapmi geavvá jaskadit
Frende dáhkádusfitnodat muittuha ahte juohkehaš sáhttá hárjehallat vuodjat, ahte lea erohus vuodjat basseaŋggas go mearas, ja ahte geasset ii galgga leat beare jállu.
Muđui dieđiha ahte heavvaneapmi ii leat nu movt filmmain, ahte olmmoš huiká ja seavvá. Muhto geavvá eambbo jaskadit, dan dihte go olmmoš geahččala olles iežas fámuiguin vuoigŋat.
