Egil Utsi ii lean vuordán ge ahte Ávvir váldá suinna oktavuođa «Juovlafuomášumi» oktavuođas. – Munnje skeaŋka go?! Manne?, imaštallá son.
– Egil Utsi jođiha Kárášjoga sámiid searvvi, mii lágida sihke giella- ja duodjekurssaid, ovddida sámeáššiid ja vel lea dehálaš sosiála arena midjiide, ákkastallá Kirsi Paltto iežas nammadeamis Egil Utsi «Juovlafuomašupmái».
Son čilge Ávvirii manin sutnje dat doaimmat, main lea leamaš mielde Egil Utsi, leat dehálaččat.
– Mun liikon duddjot, ja sámiid searvi lea ordnen hirbmat buorre vejolašvuođa. Dat lei munnje erenoamáš dehálaš. Ahte sámiid searvi lea ohcan doarjaga ovddidit duddjonvejolašvuođaid, ja mis leamaš hui fiinna giisákursa Kárášjogas. Dat lea leamaš munnje hui, hui dehálaš vásáhus ahte leamaš dakkár giisákursa ja mun bessen duddjot ovttas earáiguin geat leat mielde sámiid searvvis, muitala Kirsi.
Atná beaivválaččat
Vaikko kurssat loahpahuvvojedje diibmá, 2021:s, de Paltto lohká giisá man beasai duddjot son atná praktihkalaččat.
– Dat lea das mu njuni ovddas. Mun geavahan dan, doppe leat mus čiŋat, soljjut. Dat lea álo oidnosis das, mojiin muitala duhtavaš giisáduojár, Kirsii Paltto.
– Sus leat olu doaimmat
Son lasiha ja muitala ahte Egilis leat olu dehálaš doaimmat muđuige.
– Egil Utsi bargá hui olu sámegielnamaiguin, ahte sámegielnamat galget oidnot. Sus leat hui olu dakkár doaimmat. Nu maiddái go lea bargan Kárášjoga opmodaga ektui. Dat lea maid hui stuorra bargu, dadjá Paltto.
– Dál gal šaddet buorit juovllat!
Egil Utsi ii lean vuordán ge «árgabeaisáŋgara» nammadeami oažžut. Son skuviha Ávvira kantuvrii, gos mii lohkat sutnje Kirsi Paltto čilgehusa.
– Dan gal in leat vuordán ge, dadjala son.
Ávvir geige skeaŋkkaža. Kárášjoga sámiid searvvi stivralahtus ilbmet mojit njálmmis. Son rahpá skeaŋkkaža, geahččá mii dan siste lea ja namuha jitnosit dan maid oaidná skeaŋkkas.
– Dál gal šaddet juovllat, buorit juovllat dán jagi. Áibbas erenoamáš, mojohallá Egil.
– Dat livččii máilmmi buorre juovllasávaldat
Utsi ii loga muitit guhká lea bargan Kárášjoga sámiid searvvis, muhto dadjá moaddelot jagi sihkkarit lea bargan das. Sutnje lea deháleamos doaibman leamaš oažžut olbmuid geavahišgoahtit sámegiela. Muhto sus ge lea sávaldat.
– Mii leat veaháš eallilan olbmot stivrras ja searvvis. Sávvamis oažžut nuorragearddi váldit badjelii jođihit searvvi. Dat livččii máilmmi buorre juovlasávaldat, mojohalla Egil Utsi.
