Dálvi lahkonišgoahtá ja elrávdnji lea sakka divron maŋemuš áiggiid. Huksengálvofitnodagas leat olu buorit rávvagat mo seasttát elrávnnji.
– Mii oaidnit ahte viessoeaiggádat álget ráhkkanišgoahtit dálvái. Dál leat olusat gávppašeamen dávviriid sihke barttaide ja viesuide. Dábáleamos lea ahte ođđasit isolerejit lovtta, lonuhit uvssaid ja glásaid, muhto buot hálbbimus lea jus bidjá duogŋanlisttuid dahje juo dušše heŋge glássaliinniid glásaide. Ovdalisáigge geavahedje olbmot ránuid ja glássaliinniid doalahit viesu liekkasin, ja dál álget eambbosat dahkat dan fas, čilge Byggmax norggahoavda Niklas Hamberg.
Visot divrun
Juoga mii vuorjá norgalaččaid dál, lea ahte elrávdnji, reanttut ja biebmu lea sakka divron. Huksengálvofitnodagat eai sáhte dahkat maidege dainna go biebmu ja reanttut leat divrasat, muhto sii sáhttet veahkkin gávdnat čovdosiid mo seastit elrávnnji.
– Byggmax sáhttá neavvut viessoeaiggádiid. Mis lea olu bargohárjáneapmi ođasmahttit viesuid, ja diehtit makkár doaibmabijut leat buoremusat. Leat veahkkin Norgga viessoeaiggádiidda unnidit elrávdnjerehkega, lea midjiide hui mearkkašahtti, čilge Hamberg.
Ieš lea Hamberg leamaš olusiidda veahkkin ráhkkanit dálvái.
– Mii álo doarjut viessoeaiggádiid. Mis leat máŋga daga-ieš filmmat mat leat ávkin viessoeaiggádiidda. Mun lean ieš váldán atnui min rávvagiid ja elrávdnjerehket lea unnon, dan dihte sávan ahte mii sáhttit veahkkin leat earáide maid, loahpaha Hamberg
Elrávdnjeseastin tipsat
Hálbi ja álki:
Duogŋanlisttut: Duokŋat, ja duogŋanlisttut, lea juoidá mii jođánit sáhttá unnidit liekkadangoluid ruovttuin. Lea váttis jurddašit ahte listtoš sáhttá nie stuora ávkin, muhto čakčat ja dálvit fuobmá man jođánit galmmas beassá sisa uvssaid ja glásaid bokte.
Glássaliinnit: Orru hui álki, muhto nu lea maid! Glássaliinnit dustejit galbmasa mii suođđá glásaid bokte. Glássaliinnit dollet gálbmasa olgun ja lieggasa siste.
Láhtteránut: Láhtteránut isolerejit láhttiid ja doalahit lieggasa.
Stuorát investeren, seasttát eambbo:
Isoleret: Olusat sestet olu go isolerejit ođđasit. Erenomážit boares viesut eai nagot doallat galbmasa olgun. Lea álki isoleret lovtta ja keallára. Vaikke lea eambbo bargo isoleret seinniid, de seastá eambbo das áiggi badjel.
Lonuhit glásaid ja uvssaid: Eanemus galmmas boahtá glásaid ja uvssaid bokte. Go dáid lonuha, de doallá galbmasa olggos. Ođđa glásat ja uvssat dollet 50 proseantta eambbo lieggasa, ja luitet eambbo beaivečuovgga sisa.
Dolastallat: Investere eambbo liggenrusttegiid. Muorrauvdna lea buot buoremus, dat ligge ja dahká buori áimmu vissui. Liggenpumpa lea maid juoidá maid sáhttá háhkat vissui.
