Sámi álbmotbeaivvi leat iešguđetge vugiid mielde ávvudeamen dán jagi, ja maiddái iešguđetge guovlluin Sámis. Dás logat mo njeallje nissona áigot ávvudit.
Ánne Káre Anti (23), boazodoalli, Kárášjohka.
– Maŋimuš jagiid lean leamašan meahcis ealu luhtte. In láve gal nu ávvudit, geahčan TV-prográmmaid mat leat čadnon Sámi álbmotbeaivái, muitala Ánne Káre Anti.
Ebba Svonni (21), studeanta, Johkamohkki/Luleju
– Mun láven ávvudit Sámi álbmotbeaivvi lagas olbmuiguin ja čiŋadan gávttiin. Dál áiggun dušše leat guimmiin ovttas ja ávvudit suinna, muitala Ebba Svonni.
Sarah Mariell Balto (23), Hawaii/Kárášjohka
– Mun áiggun čohkket skihpárjoavkku ávvudeapmái dáppe mu luhtte Hawaiias, gos galgá leat sihke njálgga borramuš ja juhkamuš. Muđui láven dábálaččat oassálastit ávvudeamis mii lágiduvvo Kárášjogas, dadjá Sarah Mariell Balto.
Ina Omma (30), aktivista ja dáiddár, Skiellet
– Mii boahtit ávvudit dáppe Skellefteås eará sápmelaččaidguin gielddas, oassi olgun ja oassi Sara kulturviesus gos doalahat gaskka ja čuovvut gáržžidemiid.
Mannan jagi leimmet mielde levgemin dáppe Skiellet gávpotviesus, čuoččuimet olgun muohttagis ja lávlluimet nationálalávlaga. De boraimet gáhku geavkkanbeavddi guoras lagamusain dušše. Ledjen diŋgon báikkálaš láibbohagas gáhku mas lei Sámi leavga. Mus lei gákti alde, dieđusge, dadjá Ina Omma.
