Trøndelága stáhtahálddašeaddji dieđiha muskaeallit Trøndelágas birgejit bures guovllus ja muskanáli lohku lea stáđis. Njukčamánu álggus ledje 214 ealli Dovre duoddaris go lohke muska elliid. Diimmá dálvvi ledje 227 ealli.
Trøndelága stáhtahálddašeaddji lohká preassadieđáhusas ahte ledje vuordán muskaelliid logu veaháš geahppánit diimmá dálvvi ektui.
– Stáhta luonddubearráigeahčču lea čuvvon mo muskačorragiin manná ja galle ealli leat nális, lohká Trøndelága stáhtahálddašeaddji ossodatjođiheaddji Gry Tveten Aune preassadieđáhusas.
Stáhta luonddubearráigeahčus lea ovddasvástádusa áimmahuššat Dovre duoddara muskanáli ja lohkat galle leat jahkásaččat. Dán vahkus fitne Stáhta luonddubearráigeahču olbmot ja Oppdal gilialmennet, Lesja várrestivra ja Dovre várrestivra lohkamin muskkaid. Oktiibuot ledje 214 ealli, ja dain ledje 47 gálbbi.
Hálddašanplána, ii eambbo go 200 ealli
Trøndelága stáhtahálddašeaddji hálddaša moskusnáli Dovre duoddaris ja lea ráhkadan hálddašanplána. Moskusealli lea amas ealli Norgga luonddus, de lea dehálaš čuovvut dárkilit mielde mo dainna manná. 2017 hálddašanplána mielde ii galgga muskanáli lohku leat eanet go 200 ealli dálvit. 2017 rájes leat geahpedan muskanáli logu birrasii 250 elliin. Stáhta luonddubearráigeahčus lea ovdasvástádus geahpedit logu jagi 2017 áigumuša mielde.
