«Dutkan Davvin» ovttasbargu galgá loktet museadutkiid ovttasbarggu davimus fylkkas.
– Prošeavttain ásahit deaivvadanbáikki mii galgá nannet gelbbolašvuođa sihke hárjánan ja easkkaálgi dutkiin Romssa ja Finnmárkku museain, čállá Álttá musea konserváhtor Daria Polishchuk preassadieđáhusas.
Kulturráđđi lea museaid ovddidanprográmma bokte juolludan ruđa golmma jagi prošektii. Maiddái fylkkasuohkan doarju ruđalaččat ja fágalaččat. Álttá musea dat lea lágideaddjin dás, masa bohtet dutkit buot museain Romssas ja finnmárkkus. Metodologiija ja teoriija galgá earret eará leat guovddážis deaivvademiin,
Vuosttaš čoagganeapmi lea Álttás njukčamánu 22.–24 beaivvi. Sii čállet ahte doppe leat fágalaš ovdanbuktimat oasseváldiin ja čállinbájis.
Doppe ovdanbuktet teavsttaid ja ságastallet teavsttaid birra. Áigumuš lea čatnat ođđa ovttasbarggu ja oktavuođaid. Sii áiggošedje eambbo almmuhit dieđalaš bargguid maid Finnmárkku ja Romssa museaid bargit leat čállán, ja ohcat oktasaš prošeaktaruđaid viidáset dutkanbargguide.
