– Mus ii leat vuosteháhku nissoniidda

– Dat leamašan hui ártet go galgen leat jávoheapmin in ge galgan vástidit moaitagiidda, in ge bealuštit iežan. Muhto dát digaštallamat mat leat leamaš, leat veahkehan ovddidit nissonvealahanfáttá hui olu, ja dál olbmot hupmet dan birra miehtá, muitala SlinCraze dahje Nils Rune Utsi dál Ávvirii.

SlinCraze almmuhii mannan vahkkus ođđa lávlaga «Dus lea» mii lea boktán digaštallamiid ja reakšuvnnaid. Lávllateavsttas dadjá earret eará: «savkalan dutnje fiinna sániid, jus it hálit de šlivgen du láhttái» ja maiddái gohčoda nieiddaid fuorasin.

Ikte eahkes almmuhii sámeartista preassadieđáhusa mas čilge iežas iešdáhtos ráhkadan dán lávlaga čalmmustahttin dihte nissonvealaheami.

– Gergen lávlagiin vahkku áigi ja ráhkadettiin lávlaga de dihten dán boktit reakšuvnnaid ja digaštallamiid. Danne válden oktavuođa iežan manageriin ja moai de šiehtadeimme mo moai galge oažžut eanemus fuomášumi dán fáttá birra, muitala SlinCraze.

Dutkanbohtosat vurje

Artista muitala iežas lohkan VG-artihkkala dutkama birra mii čájeha sámenissoniid vealahuvvot dávjjit go eará nissoniid, ja lohká iežas álot beroštan dásseárvvus gaskkal nissoniid ja dievdduid.

– Dán lei hui váivi lohkat, in diehtán ahte lea nie, in ge leat goassege vásihan diekkáriid. Muhto mun in leat nissonolmmoš, danin in dieđe makkár sin dilli lea. Mun sáhtán baicce artistan čalmmustahttit dán fáttá, čilge son.

– Sáhtán váikkuhit nuoraid

Son lea ovdal ráhkadan lávlagiid mat leat leamaš kontroversieallat ja lohká iežas dain oahppan olu.

– Juste dat ahte dákkár lávlagiid ráhkadan ii leat ođas, muhto dán lávlagis háliidin fokuseret dasa ahte dás lea oaivil, ulbmil, iige dušše tulljalávlla, vaikke manager lea ge dan lohkan mediaide, muitala son ja lohká iežas jurddašan iežas ovddasvástádusa birra artistan.

– Mun lean maŋimuš jagiid fuomášan ahte mun sáhtán váikkuhit nuoraide, ja de mus lea maid ovddasvástádus. In livčče goassege dahkan ná roavva lávlaga dádjun dihte dušše. Dát lea dehálaš lávlla mii oažžu olbmuid jurddašit ja digaštallat makkár nissonoaidnu olbmuin lea. Vaikke dán maŋŋil ge maid soitet vajálduhttit dán fáttá, de sávan goit ahte nuoraide báhccá veahá muitui dat mii dál lea digaštallon, čilge SlinCraze.

Loga olles preassadieđáhusa dáppe (jus ii iđe de geahččal ođastit siiddu):

Muhtimat eai jáhke

Sosiála mediain digaštallo ahte lea go SlinCraze čilgehus jáhkehahtti. Dákkár dagut dattege eai leat apmasat, go sullasaš PR-stunttaid leat eará beakkálmasat Norggas dahkan ovdal.

2013:s digguiga guokte Norgga beakkáneamos bloggára, interneahtas ja garrasit cielaheigga goabbatguoibmáska, maŋŋil vuigiiga dán dahkan čalmmustahttin dihte givssideami mii dáhpáhuvvá interneahta bokte ja čájeheigga duođaštusaid das maid leigga plánen.

– Mus eai leat gal diekkár duođaštusat maid sáhtán čájehit, go moai manageriin plániime visot telefuvnna bokte, moai lávejetne eanaš gulahallat njálmmálaččat. Muhto jus olbmot eai jáhke dása de in veaje mun dasa maidege. Mun in sáhte earágo duohtavuođa muitalit, ja duohtavuohta lea ahte visot lei plánejuvvon ovdalgihtii.

– Lihkostuvvan

SlinCraze muitala iežas ja su managera Lars Svehagena, šiehtadan ahte manager galggai fasttit vástidit mediaide lávlaga birra. 

Mannan duorastaga vástidii ge Svehag Ávvirii ná:

– Ii dás leat mihkkege oaiviliid, what so fucking ever!

– Ii got leat oalle riska ráhkadit dákkár heajos beaggima iežat birra?

– Son galggai njulgestaga boahtit ovdan dego idiohta, mun galgen maid ovddiduvvot jallan. Hui somá lea leamaš oaidnit digaštallamiid, de dieđán ahte lean lihkostuvvan. Ja jus lea veahkehan boktit digaštallama nissonoainnu birra de lea dan veara, dadjá SlinCraze.

Ii vásit dievdduid diekkárin

Muhto ii SlinCraze leat vásihan dušše moaitámušaid, muhtimat leat maid dorjon su dan botta go digaštallamat leat jorran.

Muhtimat čállet ahte ammal dát sámeartista geahččala govvidit duohtavuođa ja ahte ammal son vásiha dákkár sátnegeavaheami leat dábálažžan dievdduid gaskkas. Muhto dan gal biehttala ieš artista:

– In eisege, ii heađisge oro nie. Muhto muhtumin ferte olmmoš lasihit veaháš, roavvásat leat jus galgá nagodit oažžut ovdán poeŋga ja boktit reakšuvnnaid. Muhtumin lea bággu šokkeret.

– Eadnái lossat

Ievttá preassadieđáhusa álggahii SlinCraze rámidemiin nissonolbmuid, erenoamážit iežas eatni ja oappáid ja fulkkiid geat leat leamaš sutnje dehálaš nissonat su bajásšaddamis.

– Mun jáhkán mu eadnái lea dát vahkku leamaš losimus, go mun in duostan sutnje ge muitalit duohtavuođa. Ikte muitalin ovdalaš go almmuhin preassadieđáhusa ja son illosii hirbmadit. Eadni diehtá maid mo mu mánnávuohta lea leamaš, mun lean leamaš nissonolbmuid gaskkas 24/7 (journ. meark. birra jándora), muitala artista.