-Almmuhus-
-Almmuhus-
-Almmuhus-
SMÁVVAOĐĐASATMuotka máhccá Sámi­ráđđái

Muotka máhccá Sámi­ráđđái

-

-

Piera Heaika Muotka máhccá Sámiráđđái gulahallanráđđeaddin.

Sámiráđđi lea virgádan Piera Heaika Muotka gulahallanráđđeaddin. Muotka lea sihke Unjárggas ja Dielddanuoris eret, ja sus lea nanu duogáš sihke sámi servodateallimis ja kultuvrras. Son dovdá Sámiráđi ja min miellahttoorganisašuvnnaid bures, ja lea maiddái ovdal bargan Sámiráđi gulahallanráđđeaddin áigodagas 2019-2021. Son lea guhká áŋgiruššan sámepolitihkas, ja son lea bargan sihke Norgga Sámiid Riikkasearvvis (NSR) ja Dáiddadálus.  – Sámiráđđi lea organisašuvdna man dovddan hui bures, ja lea bargosadji gos loavttán bargat. Háliidan áŋgiruššat sámi servodaga buorrin, ja beroštan sámi áššiin obbalaččat. Danne lean hui ilus go beasan máhccat fas Sámiráđđái, lohká Muotka Sámiráđi preassadieđáhusas. 

Muotkas lea gráfalaš hábmejeaddjeoahppu ja sus lea guhkes bargovásáhus gulahallamiin sihke ámmátlaš ja eaktodáhtolaš dásis iešguđet organisašuvnnain ja ásahusain sámi servodagas. Sus lea maid nana beroštupmi loktet stuorraservodaga gelbbolašvuođa sámi áššiin sihke našuvnnalaččat ja internašunalalaččat.

-Almmuhus-