Heahteetáhtat ožžo dieđu ikte, cuoŋománu vuosttaš beaivvi, tiibmu 14:48 skohterlihkohisvuođa birra Muorralis. Nisu 50-jagiin gii duššai, lei skohtera mielde.
Finnmárkku politiija dieđiha twittera bokte sii ožžo dieđu heahteetáhta bokte skohterlihkohisvuođa birra Muorralis Muosát gielddas. Skohterlihkohisvuođas roasmmehuvai 50 jagiin nisu nu garrasit ahte duššai. Son lei skohtera mielde. Oapmahaččat leat ožžon dieđu. Politiija lea álggahan sihke teknihkalaš ja taktihkalaš dutkama.
Jámii báikái
Finnmárkku politiijaguovllu operašuvnnajođiheaddji Gunnar Øvergaard muitala ifinnmark.no aviisii ahte Sea King gádjunhelikopter sáddejuvvui báikái ja lei báikkis tiibmu 15:33. Doavttir duođaštii nisu lei dasa jápmán roasmmehuvvama geažil.
Operašuvnnajođiheaddji muitala lei dušše okta skohter sorron dán lihkohisvuhtii. Lei almmái gii vujii skohtera ja nisu lei su mielde.
– Nisu čohkkái skohtera alde ja duššai go gahčai eret skohteris. Lihkohisvuohta dáhpáhuvai sudno astoáiggidoaimmaid geažil, muitala Øvergaard.
Son muitala dáhpáhus orru leamen lihkohisvuohta ja muitala politiija lea báikkis, guorramin ja dutkamin mii dagahii lihkohisvuođa.
