Finnmárkku fylkkamánne lea dál sádden reivve buot gielddaide gos čilge manne muohtaskohter galgá gieđahallot seammá njuolggadusaid mielde go čáhceskohter, čáziid alde.
Finnmárkku fylkkamánne lea dál sádden reivve buot gielddaide gos čilge manne muohtaskohter galgá gieđahallot seammá njuolggadusaid mielde go čáhceskohter, čáziid alde.
– Mii leat dál sádden reivve gielddaide gos mii čilget lága muohtaskohter geavaheapmái rabas čáziid alde, čállá Finnmarkku fylkkamánne.
Čakcamánu 16. beaivvi sáddii ge Finnmárkku Fylkkamánni Birasgáhttenossodat reivve Deanu gildii ja Kárášjoga gildii ahte vuodjinlohpi mii lea addon Morten Blienii, ii leat gustovaš.
Álggogeahčen jagi 2000:s lea muohtaskohtervuodjin čáziid alde lassánan Finnmárkkus. Muohtaskohter geavaheapmi čáziid alde lea dat seammá go čáhceskohteriin, namalassii lustavuodjin.
Muohtaskohter lea ráhkaduvvon dan láhkái ahte galgá vuddjot muohttagis ja ii ge čázis.
– Dáid váttisvuođaid maid muohtaskohter dahká lundui, sihke jula ja muosehuhttima, lea dat seammá maid čáhceskohter ge dahká. Sihkkarvuođariska lea olu stuorát muohtaskohteris čázis go čáhceskohteris, čállá fylkkamánne.
Luonddugáhtten direktoráhta mearrida
Čáhceskohternjuolggadusain lea ahte čáhceskohteriin ii leat lohpi vuodjit buot sajiin mearas, jogain ja jávrriin.
– Ja jus muohtaskohteriin áigot vuodjit dáid gildon sajiin de ferte Luonddugáhtten direktoráhtas ohcat lobi, čállá fylkkamánne.
Dan dihte lea fylkkamánne dál sádden reivve buot gielddaide Finnmárkkus gos čilgejuvvo muohtaskohter geavaheameláhka rabas čáziid alde.
