Mátta-Norggas lea boahtán olu muohta dan maŋimuš jándora ja Oslo politiijat ávžžuhit olbmuid baicce geavahit kollektiivafálaldaga.
Oslo politijat leat maŋemuš jándora dieđihan olu lihkohisvuođaid gártan muohtadálkki geažil ja muhtin geainnut leat giddejuvvon lihkohisvuođaid geažil.
– Oslo, Asker ja Bærum. Lea váttes vuodjinsiivu, mii ávžžuhit biilavuddjiid heivehit leavttu siivvu hárrái, rehkenastit buori áiggi ja ahte lea buorre gaska dasa gii vuodjá ovdalis. Geavat kollektiivafálaldaga jus vejolaš, celket Oslo politijat Twittera bokte.
Rehkenastit maŋŋonemiid
Maiddái Bane NOR dieđiha ahte leat váttisvuođat muohtadálkki geažil, máŋga ruovdemáđii leat giddejuvvon ja maŋŋonemiid ferte rehkenastit.
– Lea olu muohta mii dagaha váttisvuođaid dál iđitdiimmuid. Veagat leat dál čorgemin muohttaga, muhto ferte rehkenastit ahte leat maŋŋoneamit, dieđiha Bane NOR.
