Čakčii čájehuvvo teáhterbihttá «Sykle i snøstorm» (Muohtaborgan sihkkelastit), mii lea dat stuorimus buvttadeapmi teáhtera historjjás. Olles teáhtervisti galgá geavahuvvot bihtás – ja vel mearra.
Čakčii čájehuvvo teáhterbihttá «Sykle i snøstorm» (Muohtaborgan sihkkelastit), mii lea dat stuorimus buvttadeapmi teáhtera historjjás. Olles teáhtervisti galgá geavahuvvot bihtás – ja vel mearra.
Gehččiide lea earenoamáš vásáhus čakčamánu 15. beaivvi go «Sykle i snøstorm» čájehuvvo vuohččan. Dalle galget birrasii 30 olbmo ovdanbuktit musihka, govvadáidaga, teáhtera ja dánssa, dieđiha Hålogalándda Teáhter preassadieđáhusas.
Dá leat historjá sávrres, mávssolaš ja dehálaš 50-jahkásačča birra: Romssa universitehta – Norgga árktalaš universitehta. Seammás lea muitalus Davvi-Norgga birra.
Bihtás lea Davvi-Norgga Dáiddamusea mielde, Vokal Nord, neavttárat, dánsejeaddjit ja musihkkárat geat galget gehččiid doalvut mátkái vássánáigái, dálááigái ja boahtteáigái gos dáidda ja dutkan deaivvadit.
Lávii dálkin maid sihkkelastit
Bihtá rámma lea ráhkaduvvon nu ahte geahččit fitnet olles teáhtervisttis, sihke olgun ja siste, gáttis ja mearas.
– Geahččit deaivvadit olggobealde teáhtervistti, gos bovdejuvvojit gilvit lieđđelávkki mii galgá lieđđut boahttevaš jagiid. Dan maŋŋel mannet sisa Oarje-Lávdái, gos deaivvadit universitehta gáranasaiguin, Hugin ja Munin, maid Unna Hålogalándda Teáhter ovdanbuktá. Bihtás boahtá ovdan ahte son gii šattai universitehta vuosttaš rektorin, lei Peter Hjort, lávii sihkkelastit vaikko lei ge muohtaborga. Das de bođii bihtá namma, čállá Hålogalándda Teáhter preassadieđáhusas.
Bihtá sáhttet 210:s geahččat, ja de juohkásit golmma jovkui go mannet iešguđet lanjaide. Nuorta-Lávdi šaddá guossohanbáikin gos ságastallan ovdanbukto resurssaid birra. Oarje-Lávddis leat fáddán geavahanrievttit resurssaide ja eatnamiidda, seammás go ovdanbukto musihkalaš oassi.
Maŋemus oassi lea geahččalanlatnja gos čuvgejit dálkkádaga dánssain, musihkain ja neaktimiin.
Loahpahuvvo mearas
Loahpas čoagganit geahččit guollemeardái mii lea mearabealde olggobealde teáhtera. Meardarieggás besset geahččit oaidnit earenoamáš finála čájálmasas, mas lea hirpmus čuovgageavaheapmi ja musihkka man Johan Sara jr. lea ráhkadan. Loahpas mannet geahččit teáhtera vistái fas.
Bihtá dramatihkkár lea Liv Heløe ja bagadallit leaba Petter Næss ja Un-Magritt Nordseth, gii maiddái lea koreográfa. Fuomášeaddjit leaba Inger Buresund ja Yngvar Julin, ja lávdehábmema lea Ane Elene Johansen dahkan. Musihkalaš jođiheaddji lea Johan Sara jr.
Buot Hålogalándda Teáhtera fásta neavttárat servet bihttái, ja lassin leat bálkáhuvvon neavttárat, musihkkarat ja dánsejeaddjit.
