Sullii 30 mehtera gokčá muohta vázzinluotta, ja lea mehtera čieŋal go muohta fierai Finnmarkshallena dáhkis Álttás. Ii oktage geavvain muohttaga vuollai.
– Mii leat golbmii ohcan beatnagiiguin, eat ge leat gávdnan ovtta ge muohttaga vuolde. Mii áigut muhtin doaimmaid vel bargat vai sihkkarastit ahte ii okta ge leat muohttaga vuolde, dadjá Oarje-Finnmárkku politiijaguovllu politiija Sverre-André Opdahl NTB:i.
Politiijat válde cavgileami duođalažžan go Finnmarkshallenis leat oahppomeassut dál.
– Leat ollugat geat vázzet dán luottas, ja das lea joatkkaskuvla vel lahkosis. Dasa lassin go lei oahppomeassu valáštallanvisttis, ja cavgileaddji lei vuorjašuvvan, de jurddašeimmet ahte doppe leat ollu olbmot, muitala Opdahl.
Garra biegga, ollu arvi ja borga lea davvin, ja politiijat ávžžuhit olbmuid leat várrogassan dálkki dihte.
– Ollugat addet dieđu midjiide ahte lea lossa siivu, ollu muohta, geamádat ja hui garra biegga. Mii ávžžuhit olbmuid várrogasat johtit, lohká Opdahl. (©NTB)
