Son lea unnivuođa rájes liikon lávlut, leamašan mielde Melodi Grand Prix junioras ja Sápmi Talent deaivvadeamis. Dál 10. luohká nieida lea juo vuosttaš CD almmuhan.
Elliane Oskal Valkeapää lea ođđa namma sámi musihkkamáilmmis. Deaivvadan suinna maŋŋel skuvlaáiggi, humadit su áigumušaid, musihka ja eará áššiid birra. In dieđe nu olu su birra, muittán oaidnán su Guovdageainnus diibmá Nuoraid Kulturdeaivvadeami lávddis.
– Mun lean 16 jagi boaris, eret Guovdageainnus ja Gárasavvonis. Váccán maŋimuš jagi nuoraidskuvllas, muitalastá go čohkkedetne humadit.
– Álo liikon lávlut
2011:s lei Emma Elliane Melodi Grand Prix Junior finálas Oslos, oasálasttii maiddái Sápmi Talent deaivvadeamis Ohcejogas 2013:s ja lei mielde Nordic Light festiválas 2014 mii čohkkii musihkka- ja dáiddaberosteaddji nuoraid miehtá Davviriikkaid.
– Mun jáhkán lei lunddolaš munnje ahte álo liikon lávlut. Mun jáhkán go ledjen Melodi Grand Prixas 2011:s, de maŋŋel dán ožžon jáhku ahte sáhtán ráhkadit eambbo musihka. Mus šattai miella bargat eanet musihkain duon rájes.
Spealai giehtaspáppa ja čuojahii gitára
Ávvira journalista lea ge sáhkkii das maid dálá nuorat ja mánát hommejit muđuige. Emma Elliane lea measta guovtte geardde nuorat go journalista gii jearahallá su.
– Mun spellen giehtaspáppa máŋga jagi ja čuojahin gitára moadde jagi. Mus lea juoigan leamaš hui lunddolaš go leat hui ollu fuolkkit geat leat dovddus juoigit.
Musihkka, dánsun ja lávlun leat doaimmat mat leat lahka su váimmu. Son ii ge loga sosiála mediaid sutnje amas áššin.
– Dása gal bijan veahá áiggi maid, mojiin vástida Emma Elliane.
– Ii leat rievtti mielde
Mojiin vástida Emma Elliane go jerren makkár musihkkár, artista lea sutnje ovdagovva, ja ieš lasiha dasa:
– Sofia Jannok lea idola, ovdagovva. Jus jurddašit sámi artistta.
– Nabai stuorraservodaga musihkka? Dadje go moai “ii”?
Emma Elliane moddjá go gullá mu árvalusa. Dan botta go jurdila, de árvalan vel «50 cent» su ovdagovvan stuorraservodaga musihkas.
– Ii, vástida dakkaviđe, ja lasiha:
– Soaitá Beyonce
Vállješii sámegillii lávlut ovdalii dáro- ja eŋgelasgiela
«Dovddut eai gielis» CD-skearrus, man nuorra artista lea aiddo almmuhan, leat gávcci lávlaga, ja buot dat leat sámegillii. Manne válljet sámegillii lávut?
– Jáhkán danin go dát lea mu eatnigiella. Jus mun galggašin válljet man gillii lávlut, sámegillii, dárogillii vai eŋgelasgillii, de jáhkán vuosttažettiin vállješin sámegiela, dasto eŋgelasgiela ja de dárogiela.
Loga «Dovddut eai gielis» árvvoštallama dás
– Dat lávlla beare bođii
Emma Elliane lei ieš čállán lávllateavsttaid ja ollu dáin teavsttain lea ge sátni «don». Nu maiddái lea lávlla man namma «Don» mainna searvai Melodi Grand Prixii, mii lei ge vuosttaš lávlla man čállii.
– Mun muittán go čállen dán lávlaga, de ledjen olgun. Mun ledjen iešakto, ja dát lávlla beare bođii.
– Dát bođii nie nu mo dadjat «okta, guokte, golbma», dahje beare bođii sátni «don»?
Emma Elliane boagusta.
– Ii, muhto jurdda man birra galgá leat. Mun báddejin dán telefovdnii. Maŋŋel de čállen báhparii, ja bargen dainna.
– Mun in jurddaš lea go váttis vai álki
Ávvira journalista lea sáhkkii das lea go čállit teavstta lávlagii váttis vai ii. Nuorra artisttas lea dego jo gárvves ja ovdalgihtii ráhkaduvvon vástádus dasa.
– Mun in jurddaš lea go váttis vai álki. Mun beare dagan dan. Mun oaččun ovtta idéa dahje jurdaga ja čálán dan báhparii. Muhto gárvet teavstta lávllan lea váttis.
Emma Elliane mielas sáhttá gollat áigi ovdal go son lea duhtavaš lávlagiin.
– «Giellapolitiijat» leat dat geat kommenterejit Facebookas
Sutnje lea dehálaš lávlut sámegillii, muhto ii loga nu álkes bargn čállit sámegillii go leat ollugat geat de sáhttet maŋŋel cuiggodit meattáhusaid.
– Ferte muitit ahte lea rievttes giella. Dát válddá áiggi. Oainnat don vikkat seaguhit dáro- ja sámegiela. Ferten jearrat veahki eatnis, eará fulkkiin ja sámegieloahpaheaddjis lea go dát riekta. Lea go buorre vuohki ná dadjat?
– Gullet go «giellapolitiijaid» birra maidege?
– Juo, dat leat geat kommenterejit Facebookas. Juohkehaš lea veahá «giellapolitiija».
– Mii sámit maid áigot gullot
Nu mo ieš Emma Elliane lohká, de lea su vuosttaš CD-skearru mas beasai geahččaladdat ollu ja gávdnat iežas jiena ja danin das leat iešguđet musihkalaš hámit lávlagiin. Nu leat ge dan gávcci lávlaga gaskkas rap-lávlla ja luohti. Luohti, mainna loahpaha skearru, ráhkadii Emma Elliane konfirmašuvdnaleairras. Rap-lávlaga teavstta su eadni, Sara Marghrete Oskal, veahkehii čállit.
– Inspirašuvdna man birra čálán lávlagiid lea dat man birra jurddašan. Juoga mas mun beroštan. Rap-lávlla lea ge ruvkedoaimmaid vuostá, ahte mii sámit maid áigut gullot.
– Nu ahte don beroštat sámeservodaga áššiin ja dárkilit čuovvut sámemediaid?
– In soaitte nu dárkilit, muhto dieđus mun čuovun mielde.
Ii leat vuos oktage jearan autográfa
Nuorra artista ii áiggo vástidit dahje lea veahá udju go Ávvira journalista jearrá maid dadje váhnemat, ustibat ja skuvllas CD-skearru birra. Oanehaččat beare dadjá:
– Na sii gal illudit. Sii liikojedje.
– Nabai lea go oktage jearan autográfa?
– Ii, in mun leat nu beakkán gal.
Emma Ealline lea nuorra nieida, skuvlavázzi ja artista, gii sávvá eallit musihkain boahtteáiggis ja doallat konsearttaid, muhto jáhkká ahte musihkka šaddá sutnje buorren astoáigedoaibman.
Loga «Dovddut eai gielis» árvvoštallama dás
