-Almmuhus-
-Almmuhus-
-Almmuhus-
OĐĐASAT– Mun ráhkistan Davvi-Norgga

– Mun ráhkistan Davvi-Norgga

-

-

Divttasvuona bárdni lea okta dain 13 taleanttain geat leat beassan mielde erenoamáš oahpu gazzat Davvi-Norgga birra.

Sii ráhkistit Davvi-Norgga. Sii leat iešguđetláganat. Sii áigot bidjat áiggi ja garrasit bargat vai ohppet eanet vejolašvuođaid birra davvin. Sii leat gergosat Davvi-Norgga ambassadevrajovkui.

 

112 nuorra ohcci

Dán geasi ohce 112 nuorra olbmo Davvi-Norggas mielde dán oahppofálaldahkii, ja 13:is dain geat ohce besse ambassadevran. Dál galget sii čađahit stuora oahppo- ja ovdánahttinbarggu jagi badjel. Sii galget hárjehallat Davvi-Norgga bidjat áššelistui ja oidnosii.

 

Illuda

Okta dáin nuorra ambassadevrrain lea siviilaekonoma Lars Theodor Kintel (29) Divttasvuonas eret gii illuda álgit dán oahppoprográmmii.

– Lea hui somá. Illudan vuosttaš deaivvadeapmái ja oahpásnuvvat earáiguin dán prográmmas, lohka Kintel Ávvirii.

Olles Davvi-Norga lea sin klássalatnja, ja sii galget johttit Hurtigruteniin. Mátkis galget oahpásmuvvat fitnodagain, akademiijain ja politihkkáriin. Oahppu lea jagi badjel ja leat guhtta deaivvadeami. Lassin mátkkoštemiin, galget dát nuorra oahppit finadit dain «fámolaš feaskáriin» Oslos ja olgoriikas. Vuosttaš čoagganeapmi lea golggotmánu 9.beaivvi Bådåddjo gávpogis ja mátkkoštit de Tromsii.

 

Háliida loktet sámi servvodaga

Kintelis lea persovnnalaš áigumuš ovddidit sámi fitnodat álggaheddjiid ja oahpásnuvvat buorebut sámi servodahkii. Juohke oahppis lea sierra rávvejeaddji dan jagis go čuvvot prográmma.

– Šattai hoahppu mearridit searvat dása. Ledjen Chiles jahkebeali váldime guollebiebman bachelor oahpu, muitala Kintel. Son lea ollu mátkkoštan oahppama dihte olgoriikas nu go Mátta-Afrikas, Spanias, Bolivias ja Chiles, ja hupmá njuovžilit spánskagiela, lassin sámegillii, dárogillii ja eaŋgalasgillii. Maŋŋel ambassadevraoahpu áigu Kintel álgit masterohppui julevsámegielas.

Lars Theodor lea oahpis sápmelaččaide vaikko lea ollu golgan maŋemus jagiid. 2011-2013 áigodagas bagadalai son álgoálbmot entreprenevra prográmmas Barentsguovllus.

– Dovddan ollu čeahpes sámi nuoraid ja háliidan veahkkin ovdánahttit sámi servvodaga. Persovnnalaččat lea dát hui dehálaš oahppu munnje go lea čadnon mu identitehtii. Mun ráhkistan Davvi-Norgga, loahpaha Lars Theodor Kintel.

 

Dá leat sii geat leat válljejuvvon leat mielde jahkásaš oahpus:

Håkon William Skog Erlandsen, Mo i Rana

Lars Theodor Kintel, Divttasvuotna

Tom Steffensen, Vågan/Bådåddjo

Siri Arntzen, Moskenes/Tromsa

Mia Constanse Figenschou Gylseth, Moskenes/Oslo

Lisa Friborg, Báhccavuotna

Kristian Einem Solaas, Evenášši/Harstad

Lars Tveiten, Tromsa

Marius Hansen, Loabát/Gøteborg

Silje Skog, Ráisavuotna

Benedicte E. Langseth-Eide, Čáhcesuolu/Tromsa

Silje Ingebrigtsen, Áltá

Petter Bjørkli, Hammerfeasta

-Almmuhus-