Guovdageainnu stuorimus bellodaga, Johttisápmelaččaid Listtu sátnejođiheaddjeevttohus, lea dolkan gullat ahte sin bellodat ii fuola sátnejođiheaddjeámmáha vaikke lea leamašan stuorimus bellodat Guovdageainnus maŋŋel válggaid.
Guovdageainnu stuorimus bellodaga, Johttisápmelaččaid Listtu sátnejođiheaddjeevttohus, lea dolkan gullat ahte sin bellodat ii fuola sátnejođiheaddjeámmáha vaikke lea leamašan stuorimus bellodat Guovdageainnus maŋŋel válggaid.
Dat mii Johttisápmelaččaid Listtu sátnejođiheaddjeevttohusa, Anders S. Buljo, oažžu reageret lea Ávvira lávvordataviissa oaivečálus, mas čálli geažuha ahte Johttisápmelaččaid Listtus ii leat dáhpi gáibidit sátnejođiheaddjeámmáha maŋŋel válggaid, vaikke lea stuorimus bellodat. Buljo lohká dán ovdal su áiggi vuohkin man ovddas son ii sáhte vástidit, muhto lohká dál sáhttit áibbas čielgasit iežas jienasteddjiide lohpidit juoidá:
– Jus mii leat ain stuorimus bellodat maŋŋel dáid válggaid, ja mii leat bargame cegget stivrejumi suohkanis, de lea Guovdageainnu Johttisápmelaččaid Listu mas sátnejođiheaddji lea!
Dahl ovttasbargoguoibmi
Jus historjjálaččat geahččá movt Guovdageainnu Johttisápmelaččaid Listu lea ovddidan iežaset bellodaga šiehtadallamiid bokte maŋŋel válggaid, de leat ge sii álot válljen ovttasbargat Guovdageainnu Gurutbellodagain, ja Anton Dahlain. Dan ovttasbarggus lea álot Anton Dahl leamašan sátnejođiheaddjin, dahje jurddašuvvon sátnejođiheaddjin, vaikke Johttisápmelaččaid Listu lea leamaš liikká stuoris go Gurutbellodat, dahje vel eanet áirasat ge suohkanstivrras.
Ferte šiehtadallat álggos
Dahl lei sátnejođiheaddjin 1994:s gitta 1999:i. 2003:s lei maid sin ovttasbargu posišuvnnaid juohkime gaskaneaset, go Olgešbellodat dalle spiehkkasii konstitueremis, ja attii baicca doarjaga Sámeálbmot Bellodahkii, ja Klemet Erland Hættai. Hætta šattai ge sátnejođiheaddjin dalle, ja lea dan rájes leamašan sátnejođiheaddji. Dalle lei maid Anton Dahl dat gii galggai sátnejođiheaddjin, ii ge Johttisápmelaččaid Listtu áirras.
Anton Dahl ii leat nu sihkar, jus sin ovttasbargoguimmiin, Gurutbellodagas, Olgešbellodagas ja Johttisápmelaččaid Listtus, lea eanetlohku maŋŋel válggaid, ahte gii lea sátnejođiheaddji:
– Ánte (Anders S: Buljo) gal diehtá ahte dat lea šiehtadallamiid duohken, ii ge sáhte dál álgit dan dadjat ahte sis lea sátnejođiheaddji
Beare olu boazodoallu
Guovdageainnu Lagasrádio váldoredaktevra, Nils Martin Kristensen, dovdá Guovdageainnu politihka erenoamáš bures. Son ii jáhke Johttisápmelaččaid njunuš Anders S. Buljo háliida válgii mannat gos ovdagihtii lea almmuhan ovttasbarggu Gurutbellodagain, ja ahte Gurutbellodat maid váldá sátnejođiheaddjeámmáha.
– Sámmol-Ántte háliida ieš fámu suohkanstivrras, danin jáhkán sin dán háve háliidit sátnejođiheaddji ámmáha, lohká son. Kristensen liikká dadjat ahte ii leat sihkar sii ožžot dan.
– Lea álot leamašan dakkár jaskes ovttaoaivilvuohta suohkana politihkkáriin, ahte johttisápmelaččat eai galgga sátnejođiheaddjeámmáha oažžut. Várra go ballu lea ahte šaddá beare olu boazodoallovuoigŋa suohkanis, lohká son vel loahpas.
(Ášši lea almmuhuvvon báberaviissas 14.08.15)
