Sátnejođiheaddji Tor Asgeir Johansen muitala iežas hirpmahuvvan go lea gullan rohcošemiid ja jávohisvuođa birra Divttasvuona suohkanis mat galget leat dáhpáhuvvan máŋggaid jagiid. Dál sávvá son duohtavuođa almmostahttot.
11 nissonolbmo ja dievdoolbmo, julevsámit, buohkat Divttasvuonas eret, muitalit VG-aviisii rohcošemiid birra maid birra eai leat hupman dan dihte go galggai gáhttet rohcošeaddji, gili dahje lestadiánalaš searvegotti.
VG aviisa lea ožžon dieđuid 47 muitalusa birra nissonolbmuin ja dievdoolbmuin geat muitalit rohcošemiid birra mat galget leat dáhpáhuvvan mánnán ja nuorravuođas, maŋemus 30 jagi.
Logenáre olbmo galget leat namuhuvvon rohcošeaddjin, muhto dušše moattis leat dubmehallon.
– Mun lean hirpmahuvvan. Mii eat hálit ahte galgá leat ná, muitala sátnejođiheaddji Tor Asgeir Johansen NTBii.
Várálaš doaibma
Suohkan lea ráhkkanan dasa ahte áššit galget almmustahttot aviissas ja leat ásahan telefuvnna masa buohkat geain lea dárbu sáhttet riŋget jus áigot veahki.
– Mii eat vuordde vuos beare ollugiid váldit oktavuođa ovdal olbmot leat beassan lohkat áššiid ja jurdilit veháš, muitala Johansen.
Son deattuha ahte ii leat sáhka olles suohkana birra, muhto muhtin joavkkuid birra mat gullet lestadiánalaš searvegoddái.
Boahtá ovdán ahte dieđut rohcošemiid birra maid báhpat searvegottis leat ožžon, eai leat mannan viidáset politiijaide ja eará veahkkeásahusaide suohkanis.
– Dát lea várálaš doaibma ja liikon unnán dasa, muitala Johansen NTBii.
Váidet suohkana
Muhtin nisu galgá skábmamánu diggái go lea stevdnen Divttasvuona suohkana. Son lohká almmolašvuođa beahttán go mánáidsuodjalus ii váldán sus fuola go su áhčči dubmehallui seksualálaš rohcošemiid dihte.
Sátnejođiheaddji ii sáhte kommenteret dán proseassa mii galgá diggái.
– Maŋŋel go áhčči šattai giddagassii, álge earát gilis mu rohcošit. Rohcošeamit šadde vearrábun, muitala nisu rohcošemiid birra mat galget dáhpáhuvvan dan rájes go son lei 9-jahkásaš gitta son šattai 19 jahkásažžan.
Suohkan ceggii bearjadaga veahkketelefuvnna ja ásahii heahtejoavkku ovdal go VG almmuhii čállosiid dán vahkkoloahpa. Duorastaga lei álbmotčoahkkin gos váruhuvvui ahte čállosat mat almmuhuvvojit sáhttet buktit stuora váikkuhusaid.
– Mii leat gullán gilis ságaid, muhto go eai leat duođaštusat, de lea váttis veahkehit, muitala dearvvašvuođa- ja fuolahushoavda Lill-Tove Hansen.
Suohkana jođiheapmi muitala ain leat stuora kulturerohusaid sámiid ja norgalaš servvodagas Divttasvuonas.
Váttis áššit
Lestadiánalaš čoahkkaneamis Divttasvuonas ii áiggo okta ge dadjat maidege, muhto čujuhuvvo Odd Fagerfjordii gii lea našuvnnalaš cealkámušolmmoš lestadiánalaš čoahkkaneapmái Norggas.
Oskko servvodagas lea sierra bagadus movt gieđahallat seksualálaš rohcošemiid.
– Dákkár áššit leat váddásat, muhto maid nu dehálaččat. De hui dehálaš ahte sihke rohcošeaddjit ja gillájeaddjit ožžot veahki masa sis lea riekti oažžut. Rohcošeaddjái lea bárti go ii sáhte stivret iežas. Lea juoga mii doalvu su, muitala Fagerfjord VGii.
VG lea viežžan loguid mat čájehit ahte 1997 rájes gitta 2014 rádjái leat 67 ášši dieđihuvvon dahje váidon suohkanis gos ásset 1941 olbmo. Dain áššiin leat 82 proseantta áššiin heaittihuvvon.
– Go lea sáhka erenoamážiid Divttasvuona birra, de sáhtán mannat nu guhkás ja dadját ahte dovdo heahpatvuohta ja deasta birrasii mii balddiha. Vihttánat várrejit iežaset ja eai hálit bearrašii addit eanet lossa deattu go dárbbašlaččat, muitala ovdalaš leansmánni Divttasvuonas, Kenneth Nilsen. (©NTB)
