Ávvir lea dáhtton olbmuid sáddet evttohusaid geaidda galggašii addot veaháš fuomášupmi. Dalle čáliimet ahte ohcat olbmo gii buktá moji ja ilu, juogo bargosajis dahje astoáiggis. Mii ozaimet árgabeaisáŋgára.
Álbmogis lea boahtán evttohus ahte Ávvira juovlafuomášupmi galggašii dáiddárguoktái Anna Katrii ja Anthonii.
Berit Ragnhild Triumf, Marianne Siri ja Ellen Karin Marjana Gaup leat čállán ahte Anna Katri Helander ja Anthoni Hætta ánssášeaba juovlafuomášumi. Sii čállet earret eará ahte Davvi Divisionis lágidit suohttasiid, deaivvademiid, astoáigedoaimmaid ja olu eará doaimmaid, suohkana mánáide ja nuoraide.
Anna Katri ja Anthoni leaba Davvi Divisiona ásaheaddjit. Davvi Division lea Guovdageainnu nuoraide deaivvadanbáiki, ja addá lávddi ođđa ja nuorra sámi artisttaide.
– Sudno dihte besset mánát ja nuorat ovttas deaivvadit, ohppet juoidá ja somás doaimmaid, čállet iežaset árvalusain.
– Oi!
Ávvir fitná Davvi Divisiona visttis, geigeme juovlafuomášumi Anna Katrii.
Anna Katri váldá vuostá skeaŋkkaža, ja njuorasmuvvá go gullá manne su lusa boahtá journalista.
– Ja mun doivon dál boađát govvet min báikki, ja mun lean hirbmadit čorgen ja bassan dáppe, reaškkiha son.
Son lohká hui somán go oažžu dakkár fuomášumi, ja lohká maid hui somán go Ávviris lea dakkár fálaldat dál. Ja lohká šállošahttin go Anthoni ii lean Guovdageainnus, iige beassan searvat ja váldit vuostá skeaŋkkaža.
– Nie lea dáiddáreallin, ii álo heive, moddjesta Anna Katri.
Go gullá maid Triumf, Siri ja Gaup leat čállán evttohusain, de lohká hui somán.
– Somá go árvvus atnet min barggu. Sávan sii geaiguin mii ovttasbargat, maid váldet dán rámi. Dát fuomášupmi lea sidjiide maid, muitala Anna Katri.
Son deattuha ahte dákkár fuomášupmi addá eambbo movtta ja motivašuvnna eambbo doaimmaide boahtte jahkái.
Bosihit
Anna Katri muitala ahte sus eai leat nu stuora plánat juovllaide, muhto áigu bearrašiin návddašit juovllaid. Muđui áigu ávvudit juovlaruohta ja bosihit, ovdal go ođđa jahki rahpasa.
