-Almmuhus-
-Almmuhus-
OĐĐASAT– Mun balan ahte mii massit luohttá­muša

– Mun balan ahte mii massit luohttá­muša

-

-

Suohkanstivraáirras Inger Máret Bongo (BB) lohká dovdat suohkandirektevrra dan mađe ahte ii duššiid gal dieđit departementii. – Dalán go gullojit sánit «korrupšuvdna» ja «politihkka», de dat addá hui heajos gova sihke politihkkariin ja suohkanis. Mun balan ahte mii massit luohttámuša jus eat bisset heajos kultuvrra, lohká son.

Son suorganii go logai suohkandirektevrra Kent Valio ovdasáni, ahte lei dieđihan Bargodepartementii dohkketmeahttun bargobirrasa, go dovdet ahte muhtin politihkkárat bággestallet hálddahusa dohkketmeahttun doaimmaid čađahit.

Dál galget dutkojuvvot

Gaskavahku gieđahalai suohkanstivra jahkedieđáhusa mas Valio lei čállán dieđihanášši birra ja evttohan ehtalaš njuolggadusaid. Ovttajienalaš suohkanstivra mearridii bivdit stáhtahálddašeaddji guorahallat sihke dáhpáhusaid ja politihkkáriid láhttema. 

– Mun lean hui duhtavaš go oaččuimet ovttajienalaš mearrádusa čađahit iskkadeami. De goit bohtet ovdan dat áššit, iige šatta nu ahte juoga lea dáhpáhuvvan  ii ge oktage dieđe mii dat lea, lohká Bargiidbellodaga suohkanstivraáirras Inger Máret Bongo (BB)

Loga maid:
Suohkanstivra sihtá stáhtahálddašeaddji iežaset dutkat

– Dovddan suohkandirektevrra dan mađe

Guokte vahku leat ságat jorran márkanis. Olbmot jáhkket ahte go lea suohkanstivrras, de diehtá mii dat lea dáhpáhuvvan.

– Dieđusge leat olu spekulašuvnnat ja juohkehaš vuordá ahte mii, geat leat suohkanstivrras, diehtit mii lea dáhpáhuvvan. Orru nu ahte ovdagoddelahtut eaige oro diehtime, eai goit juobe lohkange diehtit. 

– Ovdagoddi čujuha bargiidláhkii?

– Juo, de šaddá ge hui imaš go suohkandirektevra lohká juoga lea dáhpáhuvvan ja politihkkárat lohket sii eai sáhte hupmat dan birra. Oaivvildan ahte mis galgá dan mađe rabasvuohta ahte jus lea dáhpáhuvvan mihkkege, de galgá boahtit almmolašvuhtii. Olbmot galget beassat diehtit, lohká son.

– Balat go ahte lea korrupšuvdna dáppe?

 – Dat lea hui váttes ášši. Mun dovddan min suohkandirektevrra dáinnalágiin ahte son gal ii váldde ovdan áššiid jus ii leat mihkkege doppe duogábealde, lohká son.

– Balat go suohkanpolitihkkáriid massit luohttevašvuođa?

– Balan dieđusge. Dalán go gullojit sánit «korrupšuvdna» ja «politihkka», de dat addá hui heajos gova sihke politihkkariin ja dan systemas mas leat. Mun balan ahte mii massit luohttámuša.

Muitá 2011 dáhpáhusa

Maiddái Inger Máret Bongo muitá bures go 2011:s Dáloniid Lista lei mielde mearrideame doarjaga Isak Mathis O. Hættai. Su mielas ii lean diet ruhtajuolludeapmi buorre obanassiige. 

Loga maid:
GLR redaktevra lohká ehtalaš njuolggadusaide leat dárbbu: – Muittán bures go bellodatustibat rievdadedje fitnodateaiggáda loana doarjjan

 – Mun muittán dien ášši ja bohte oba olu reakšuvnnat dasa movt dat lea vejolaš iežas bellodatskihpáriidda njuolggut addit ruđa. Diet mearrádus ii vissa meannuduvvon áibbas njuolggadusaid mielde. Lea sihkkarit leamaš guhká dakkár heajos kultuvra ja dál lea áigi ahte mii čavget, ja buot buoremus vuohki oažžut eret dakkár kultuvrra, dat lea oažžut visot oidnosii. De olbmot dihtet go de mii soaitit nagodit bissehit dan boahtteáiggis.

Dássážii ii leat boahtán ovdan gean birra suohkandirektevra čállá iežas dieđiheamis.  

-Almmuhus-